КЬУРВАННУЛ АРС КЬУРБАНОВ ХIАСАНХIУСАЙН
Апрельданул 4-нний, оьрмулул 85 шинаву, хар-хавар бакъа ахиратравун лавгунни ххаллилсса лаккучу Кьукниятусса Кьурбанов ХIасанхIусайн.

ХIасанхIусайн увну ур 1930 шинал Кьукуннал шяраву Кьурваннул ва ПатIиматлул кулпатраву. 1948 шинал Гъумучиял дянивмур даражалул школагу къуртал бувну, увххун ур Щурагьиял дахху-ласулул техникумравун. 1951 шинал техникумгу къуртал бувну, зун айивхьуну ур МахIачкъалаллал рыбоконсервный комбинатрай, цал бухгалтерну, яла хъунама бухгалтерну.
ХIасанхIусайннул цалла даврил усттаршиву ккаккан дурссар, Дагъусттаннай бакъа, щала Совет хIукуматрай агьаммунин ккаллийну бивкIсса, М. ХIажиевлул цIанийсса заводрай зузисса чIумал. 1966 шинал ув­ххун, пенсиялийн укканнин зий, сайки 25 шин дурну дур ва завод­рай, миннувату 17 шин хъунама бухгалтерну.
Цалла кIулшиву хъиннура ларай дан, ХIасанхIусайннул Москавлив къуртал бувну бур хъуними бухгалтертал хIадур байсса курсру, мукьийла лавгун ур Ленинградуллал кIулшиву ларай дайсса институтравун, цалла пишакаршиву гьаз дан.
МарцIну даву дан ччисса ХIасанхIусайн ия цалчин цаятура, яла бухгалтериялуву зузиминная ва лагма-ялттунаяту цIакьсса тIалавшин дусса инсан. Уссия, заводраву акъа, СССР-данул Судостроениялул министерствалул хъуниминнал дянивгу бусравну ва лавайсса хIурматрай. Гьан айссия министерствалувун бухлахисса заводирттай ревизия бан.
ХIасанхIусайн лайкь хьуну ия хIукуматрал чIярусса бахшиширттан, грамотарттан.
ХIасанхIусайннул бунагьирттал аьпа баннав тIий, ванал кьурчIисса бивкIулул къумашиву кIидачIлай, дакIнийхтунусса жижара буллай буру кулпат Аьишатлухь, душру Зайнавлухь ва Гулизардухь, душнил душ Камиллахь, уссил ва ссил оьрчIахь, махъсса цинявппагу гъан-маччанахь. Махъминнал оьрмурдай барачат бишиннав. ХIасанхIусайннул гьав нурданул дуцIиннав, алжаннул ххари аннав.
Кьукуннал жямат

————————————-

МАХIАММАДЛУЛ АРС АЬШАЕВ ИСРАПИЛ
ЗахIматсса цIуцIаврища хха­ссал къавхьуну, аьпалухьхьун лавгунни лавайсса даражалул учитель, Хъунайннал школалул директор, Аьшавхъал Исрапил МахIаммадлул арс.
Исрапил увну ур Вихьлив 1958 шинал. Буттал шяраву школагу къуртал бувну, увххун ур Дагъусттаннал паччахIлугърал университетравун, химиялул факультетрайн. Университет къуртал бувну махъ зий ивкIссар Кьубиял школалий. Мичча Хъунав зун тIайла увкссар. Шикку ккаккиялунсса къаттагу бувну, Исрапил школалул цIа лахъ дуллай ивкIссар. Му директорну зузисса ппурттуву Хъунайннал школа сийлий буссия. Исрапиллул ларсъссар АьФ-лул просвещениялул лайкь хьусса зузалал цIа.
Ва кIиачIин шайсса акъая вихьуллаща ва хъунайннаща: ия хIакьсса вихьличугу, цIакьсса хъунайричугу. Ванал буккайва Кьуран, аьжамрайгу буккин-чичин кIулссия. Аьшавлавл (ванал буттал буттал) цала циняв оьрчIан ва душваран аьраб­рай (аьжамрай) букки-чичин лахьхьин бувссар, коммунистал цала хъирив багьлай, ххиххузив дичлай бунувагу.
Исрапиллул чумартшиву, кьянкьашиву, нитти-буттахасса, кулпатрахасса аякьа, дакI хъиншиву мудангу дакIний личIантIиссар ва кIулцириннан. РахIатну шанашу, кIирагу щарнил аькьлулул кьуллай, бусравсса дакIнил заллуй. Вил цIа щяв къадагьан ритансса вил оьрчIругу буссар.
Исрапил аьпалул хьусса хъуннасса кьурчIишиву кIидачIлай, жижара буллай буру кулпатрахь, оьрчIахь, уссурссуннахь, гъан-маччанахь, махъсса цинявн­нахьвагу. Цал гьав нурданул дуцIиннав, алжаннул къапурду тIивтIуну лякъиннав, махънал оьрмурдай барачат бишиннав. Амин.
Вихьуллал
ва Хъунайннал жямат