![](https://ilchi.info/wp-content/uploads/2022/06/-неххамачIувсса-къатри-e1654884487548.jpg)
Уттигъанну ЦIумадиял райондалийсса ца шяраваллил кIану ккаккан буллай бия телевизорданувух. КIиккусса ххуллу бия аьтарттул лавсун лавгун. Аьлимтал буслай бур Ккавкказуллал зунттурду яла жагьилми хъанахъишиву. Мунияту вай бувар утттигу хъунив хъанан. Жагьилтураву гуж бикIайни кунма, вайгу тIабиаьтрал ишру хъанахъийни цала «хасиятру», «гужру» ккаккан буллан бикIайнуккар. На махIаттал хъанан икIара вай жагьилсса зунттурду инсантурал мютIи баврий. Дурну дур шяраваллу, ххуллурду ххяллал, хъархъаллал, щамарал бакIурдай. Вай укун давривугу, явара, хъинну куртIсса пикри бивкIун бур.
Амма махъсса ппурттуву янилун дагьлан диркIунни, циксса институтру буккирчагу, кIулшивуртту ласурчагу, инсантал яхъанансса къатри нигьачIисса кIанттурдай дуллай бушиву. Къатри дуллай бур зунттавусса, кьаннайсса неххамачIурдаву.
Шиккува кIицI буван, къатри дувансса аьрщи дулай, шагьрулул, шяраваллал администрациярттал. Ми къуллугъчитуралгу, пикри къабувну, экологтурахь къацIувххуну, архитектортуращал маслихIат къаккавккун, дуллай бур аьрщи нигьачIисса кIанттурдай.
МахIачкъалалия Дарбантуллал чулийнмай нанисса трасса, Манасрая ливчуну, неххайх бувсса ламуйх бачайхту зун ххал хьунтIиссар неххамачIув щаллусса поселок. Ца-кIира кьини гъараллу лачIлай, мугьали буккарча, чIалай дуссар гай къатри хьхьириву хьуншиву. Муна мукун, цаппара шиннардил хьхьичI, Дарбантуллал ялувсса, Жалгъан тIисса зунттул ххинчурдайн чявхъа бивчуну, ганиннин гай щин дачайсса кьакьардаву инсантурал къатри дурну, Дарбант шагьрулул бачIи гьагълил бувцIусса иширая зун бавхьунссар.
Ялагу, жунма географиялул дарсирдайва кIулну бурхха Каспий хьхьири аьмсса океаннаяр 26-28 метралул ялавайну бушиву. Му ишгу хIисавравун лавсун, бувну бивкIссар МахIачкъалаллал чIарах Бакуйннал чулийнмай муххал ххуллу. Ва муххал ххуллул лувгу цукунчIавсса гьанусса къатри къадикIан багьлай бивкIссар. Шиккурив щаллусса шагьру хьуну бур. Вана жува, жунма бакъассагу, ялун нанисса никиран «къатIа» бизлай.
Вихьлияту Ваччав нанисса чIумал на махIаттал уллан икIара баччи бакъа дурсса къатрал. Хъюйннал шяраваллил чIарах нанисса Хъун-Неххал неххамачIув дур инсантурал къатри дурну. Мадулларду зува яхъанансса къатри неххардил зумардацIух.