«Аьрасатнал гьар шинах нагь ва качар (писукI) буккан байссар тамансса луртандалущал, мунияту ми сурсатру дукиялул базардаву чан хьун къабюхъайссар», – кунни ДР-лул шяраваллил хозяйствалул министрнал цалчинма хъиривчу Шарип Шариповлул.

[dropcap]М[/dropcap]унал тIимунийну, Аьрасатнал шинай дуккан дайсса дур 6 млн тонна пархтIутIул аьгъушиврул ( нагьлил), амма ишла дайсса дур 2 млн тонна. Мукьра млн тонна личIлай дур чил билаятирттайн дахханссагу. Жула билаятрал шинай итадакьайссар 5,7 млн тонна качарданул, харж дайссар – 5,6 млн тонна, – кунни Шарип Шариповлул мартрал 22-нний Къарабудахкантуллал райондалийн лавгсса чIумал.

Мунал тIимунийну, жула билаятрай чIявуми журардал дукиялул сурсатру дуккан дуллай бур ишла дуллалиминнуяр ххишалану.

[dropcap]М[/dropcap]у бакъассагу, жула билаятрал чил билаятирттан дахлай бур дазул кьатIату жура ласласиминнуяр чIярусса дукиялул сурсатру. Масалдаран, дукIу Аьра­сатнал дарххуну дур 36 млрд доллардансса дукиялул сурсатру, мура чIумал дазул кьатIату ларсун дур 34 млрд доллардан­сса дукия.

[dropcap]М[/dropcap]унил буслай бур жучIара дукия гьахьунуксса душиву ва ми гьарзат дарвагирттайну ичIуннай луртандалун ласлан аьркиншиву дакъашиву. Шариповлул мукунма бувсунни Дагъусттаннаща бюхълай бушиву жура дазул кьатIату ласайсса дукия шиккура дуккан дуллангу, Аьрасатнал цаймигу регионнайн тIайла дуклангу.