Дагъусттаннал Республикалул ЗахIматрал министерствалул социал къуллугъирттал зузалт гьуртту хьунни Донецкаллал ва Луганскаллал республикарттай нанисса хасъсса аьрали операциялий гьуртту хъанахъисса Дагъусттаннал аьралитуран кумаг баву мурадрайсса «Посылка от мамы» тIисса ихIсандалул акциялувух.
Акциялул лагрулий, март зурул 17-18-нний Къаякантуллал райондалийсса социал къуллугъирттал зузалтрал жула аьралитуран кумагран дартIунни 80 азарда къуруш ва дуки-хIачIиялул, янналул ва дарурттал 20 кьуцури. Жяматрал дартIсса арцух машан ларсунни ччяни зия къашайсса продукты, медикаментру ва аьралитурал аьркин дансса цаймигу кьай-кьуй. ЦачIун дурсса продукты ва кьай-кьуй дирхьусса 35 ящик тIайла бувккунни «Посылка от мамы» тIисса логотипирттащал.
Мукунма посылкарттаву бивхьунни ниттихъал чивчусса, аьралитурал дакI дуллалисса чагъарду.
ХIадур дурсса посылкартту Росгвардиялул аьралитурачIан диян дан тапшур бунни акциялул сиптачину увксса, Къаякантуллал райондалул социал къуллугърал зузала Шамсуттин Асламхановлуйн.
