Поэзиялул театрдануву мартрал 21-нний «Барчаллагь вин, поэзияй» тIисса, шаэртал, артистътал, луттирду ккалан ххирами цачIун бавтIсса литературалул хьунабакьаву хьунни.
Нажагьсса акъа,акъахьунссар жувува цумур-цагу назму дакIнин асар къархьусса, назмурдавасса ххару дакIний ливчIун, ми тикрал къабувайсса. ХьхьичIва-хьхьичI оьрмулуву бавсса назмурдугу ниттил накIлищал архIал кIанттух увкусса балайрду бакъарив?
Поэзиялул театрданул сахIналийгу хъамаллурал ва шагьрулул дуклаки оьрчIал Дагъусттаннал миллатирттал мазурдий щаллу бувна балайрду, бувккуна шеърирду ва дакIнийн бивчуна жула хьхьичIунсса шаэртал ва чичулт. Бия ккалай Дагъусттаннал шаэр Фазу Аьлиевал, шаэр ва публицист МахIаммад АхIмадовлул шеърирду. СахIналий мукунма бувккуна Виричуну жан дуллусса жула лакку оьрчI НурмахIаммад ХIажимахIаммадовлун хас бувсса шеъригу.
Литературалул мажлисрай гьурттушинна дуруна шаэртал Аминат Аьбдулманаповал, Бика Кулунчаковал ва цайминналгу.
БатIаврил ахирданий театрданул шеърилугърал семинарданул гьурттучитал – Вин Акаевлул, Карина Саакяннул ва Индира Зубаировал дурккуна пасихIну назмурду.
Ася ХIусайнова, журналистикалул
отделениялул студентка
