[dropcap]В[/dropcap]ай гьантрай МахIачкъалалив дунни «Лучший учитель родного языка –2022» тIисса конкурсрал хIасиллу. Март зурул 15-18-нний МахIачкъалаллал 11-мур гимназиялий буссия ниттил мазрал учительтурал дянивсса конкурс. ХьхьичIунсса учительнал цIа лайкь дуллалисса конкурсраву гьуртту хьунсса аьрзри буллуну бия республикалул районнаясса 50 учительнал.

Гьашинусса конкурсраву 1-мур кIану бувгьунни Гъуниннал райондалийсса Нижне-Кегерский школалий яруссаннал мазрал дарсру дихьлахьисса Рамазан ХIажимахIаммадовлул, 2-мур кIану — МахIачкъалаллал шагьрулул 27-мур школалул яруссаннал мазрал дарсирдал учитель Наида МахIаммадовал, 3-мур кIану буллунни Буйнакскаллал райондалийсса Атланауллал гимназиялий къумукь мазрал дарсру дихьлахьисса Саида Алхасован, Хасавюртуллал 15-мур школалий чачаннал мазрал дарсру дихьлахьисса Тоират Хуцурован ва Каспийскаллал 6-мур школалий даргиял мазрал дарсру дихьлахьисса Ххадиджат Аьли­бахмудован. Дагъусттаннал КIулшивуртту дулаврил министерствалул чулуха конкурсрай ххув хьусса ва гьуртту хьусса учительтуран буллунни дипломру ва арцуйнусса бахшишру.

Конкурсрай 1-мур кIану бувгьусса учитель гьуртту хьун­тIиссар, чIал къавхьуну республикалий хьунтIисса, «Всеро­ссийский мастер-класс учителей родных языков» тIисса рес­публикалул конкурсрай.