Ларгсса нюжмаркьини «Инт» кафелуву Дагъусттаннал Муфтиятрал просвещениялул отделданул хъаннил направлениялул ва «Гьидаят» (АНО ДО «Гьидаят») тIисса Хъаннин кIулшивуртту дуллалисса центрданул уртакьну хIадур бувсса мажлис хьунни. Ва мажлис хас бувну бия МухIаммад-Идавс (с.аь.с) ссавруннайн гьаз хьусса Миъражрал хьхьунин.
![](https://ilchi.info/wp-content/uploads/2022/03/anisat_abdullatipova.jpg)
Гьуртту хъанай бия республикалул районная ва шагьрурдая бувкIсса хъами, кIани-кIанттурдайсса динийсса идарарттал хьхьичIунми. Мажлисрай бунни ялун нанисса ник патриот зумуну, адав-инсап дуну, рувхIанийсса ххазинартту хьхьичIунну тарбия бувавриву хъаннилмур, ниттихъалмур бияла хъунмасса бушивриясса, республикалий цимигу шиннардий агьали динну ва миллатру личIи къабуллай яхъанай бушиврия ва цамур куццуй бикIан къааьркиншивриясса мюнпатсса ихтилатру. Мажлисрай «Гьидаят» центрданул директор ва Муфтиятрал просвещениялул отделданул хъаннилмур направлениялул хъунмур Загьра Исмяиловал Барчаллагьрал чагъар буллунни исламрал гьарцагу давриву чялишну гьурттушинна дуллалисса, кIицI лавгсса центрданий дуклакисса ва Муфтиятрал просвещениялул отделданий зузисса Анисат АьбдуллатIипован. Ванил чIурчIав дунни Анисат исламрал куртIсса кIулшивуртту ларсъсса, рувхIанийсса адаврал тарбия дулавриву бутIа бихьлахьисса душ бушиву, диндалул ххуллийсса даву дакI дирхьуну дуллалисса, мудангу хъинмуних, ххуймуних луглагисса бушиву. Бусанна Анисат вава «Гьидаят» центрданий душвавран Кьуран лахьхьин буллай бушиву ва Редукторныйливсса цIуну буллалисса Ися Идавсил цIанийсса рувхIанийсса центрданийгу зий бушиву. Шиккува чан-кьанну бусанна «Гьидаят» центрдания циявагу. Хъаннинсса ва дуккаврил центр хlасул бувссар исламрал университетрал гьанулий. Шикку, Кьуран буккин лахьхьин баву, аьрабнал маз лахьхьин баву дакъассагу, дуниявийсса предметругу лахьхьин дуллай бур.
Масалдаран: оьрус мазрал, историялул, психологиялул, информатикалул дарсру. Мукунма дарзинал пишагу лахьхьин бувайсса бур. Ва ялагу, тиккува буссар лавайсса даражалий даву гьаз дурсса янна дуруххай цех.
«Гьидаят» центрданийн занан хьунтlиссар ччимур оьрмулувусса душвараща, хъаннища. Агана дяхтта мажал бакъахьурча, дуссар гьанттайн чlумалсса отделениягу. Лахьхьин баву украссар.
– На зун дакlнийхтуну чlа тlий бура, нава кунма ва ххаллилсса кlанттайн тlайла бавцIусса зунгу, ялун бучIантIиминнангу, зулми дакlругу исламрал чаннал чанна дуваннав тlий. Дин лахьхьавриясса ххаришивугу чlа тlий бура. Гьар кьини диндалул кlулшивуртту куртlгу, цlакьгу дуллансса сант душиву – му Аллагьнаятусса дазу дакъасса хъиншивур, хъуннасса тирхханнур. Лахьлахьияра, ххирасса ссурвал, зулла дин, цlакьгу, куртlгу дуллалияра исламрал кlулшивуртту. Ва ишираву Бюхттулсса Аллагьу Тааьланалгу кумаг буваннав зуцlун. Амин! Дазу дакъасса барчаллагьрай бура ттулва даврин ххуйсса кьимат бивщусса хъуниминнайнгу, ва хъуннасса вихшалар, хIарачат буллантIиссара уттиния тинмайгу ва вихшала цIакь дуван, – увкунни Анисатлул.
ЛичIи-личIисса районная ва шагьрурдая бувкIсса хъаннил чаннасса симаннал чанна лахъан бувну бия ларгсса нюжмаркьини «Инт» кафелул ужагъ.