Вай гьантрай Лакрал райондалул администрациялий агьали кьамул бунни ДР-лул Халкьуннал Мажлисрал депутат Марат Илиясовлул.
КIулшиву дулаврил управлениялул каялувчи Тамирлан МахIаммадов увкIун ия КIундиннал, ГьунчIукьатIрал ва Хьурттал школарттал директортуращал, 2021-ку шинал хIасул хьусса бурж ххал бивгьуну, 2022-ку шиналсса харж булунсса арцу лякъин кабакьу бува тIий.
Вайннах вичIи диширча, ва суал щаллу бан багьлай бур райондалул кIулшиву дулаврил структура ядан бюхъаншиврул. КIундиннал школалул директорнал кIицI лавгунни, харжирдансса арцу диял хъанай дакъашивруцIун бавхIуну, цIана райондалий кIулшиву дулаврил зузалтрал оптимизация даврил ялувсса суал.
Хьурттал школалул директор Хайруттин Гъазиевлул кIицI лавгунни луттирду биял хъанай бакъашиву. Ми биял хъанай бакъасса бур, гьарца шинал цIу-цIусса автортурал цIу-цIусса итабакьлай, хьхьичI шинал бувкми луттирду тIурча, аьмсса реестрданува буккан баврийн бувну.
ГьунчIукьатIрал школалул директор Малик Къушиевлул сукку бунни школарттан аьркинсса штатру чан бувну, миннал буржру бивхьуну бушиву цайми зузалтрай.
Тамирлан МахIаммадовлул тавакъю бунни лапва чансса оьрчIру бусса школартту лакьин къабитансса чаран лякъин.
Марат Илиясовлул директортуран маслихIат бунни кIицI лавгсса суаллал ялув справкарду цачIанна диян дан, чаранну лякъиннин цува
ми суаллал хъирив лаяншиврул. Уриннал шяраваллил бакIчи Шакир Рамазановлул тавакъю бунни шяравунсса ламу бан кабакьу бува тIий.
Микку депутатнал мугьлат бакъа оьвкунни транспортрал ва энергетикалул министрнал хъиривчу Багдуевлуйн, ваналгу махъ буллунни суал хъинчулий щаллу бан.
Хъунайннал шяраваллил депутат Марат Аьбдуевлул тавакъю бия Хъунайннал ва Къуруллал шяраваллаву трансформаторду бишин кабакьу ба тIисса. Мукунма ванал кIицI лавгунни цамургу буруккин, Лахъирдал шяравату Хъунавсса ххуллу бакьин баврил ялувсса. 2020-ку шинал ва ххуллул 2 километралийхсса бутIа бакьин бувну бур райондалул ххуллул фондрал арцух.
Депутатнал махъ буллунни, трансформаторду бишаврил ялув цува ацIансса. Ххуллу бакьин баврил ялув тIурча маслихIат бунни райондалул администрациялийн буккан.
Инна ХIажиевал тавакъю бия чIал къавхьуну Национал библиотекалий дан дакIнийсса «Лакку улклул лажинну» тIисса суратирттал выставка дан кабакьу бува тIисса.
Марат Илиясовлул арцуйнусса кумаг бунни ттигъанну къатрайн цIу дагьну, ялув магъи дакъа ливчIсса Рабият Жалаеван.
