![](https://ilchi.info/wp-content/uploads/2022/03/badrizhat_magomedgadzieva.jpg)
Лакрал миллатрал тарихраву ва щала Дагъусттаннал магьирлугърал оьрмулуву агьамсса ва хьхьичIунсса кIану бугьлагьисса хъаннивасса ца бур А. Къапиевлул цIанийсса Лакрал паччахIлугърал драмалул ва музыкалул театрданул каялувчи, Аьрасатнал магьирлугърал лайкь хьусса ишккакку МахIаммадхIажиева Бадрижат Набижул душ.
Лакрал театрданий каялувшиву дуллай гьашину там хъанай дур дурусну кьура шин. Ванил каялувшиндаралу Лакрал театр машгьур хьунни щала Ухссавнил Ккавкказнаву, театрал фестиваллай хьуннав, Аьрасатнал Культуралул министерствалул сипталийсса федерал программардал лагрулийсса гастроллай хьуннав.
Хъаннил байрандалул хьунин Бадрижат МахIаммадхIажиева дуллай бур «Илчилул» анкеталухьхьунсса жавабру.
- 1. Цукунсса хьуна оьрчIний вийнма яла гужсса асар биян бувсса зат, иш?
– Депортациялия Дагъусттаннайнмай зана хьусса чIумал ниттищал архIал Ппаласмавсса цалчинсса аьрххи.
- 2. Цими никирайн дияннинсса кIулли вин вила ппухълуннал нясав? Буси яла архманал цIа.
– КIулли мукьра никирайн дияннинсса.
- 3. Инсаннал хасиятраву винна яла ккарккун къаччимур лишан?
– Жаваблувшинна дакъашиву.
- 4. Вила оьрмулуву яла алши бакъамур шин?
– Гъансса инсантал яла лавгсса 1998, 2018, 2021 шинну.
- 5. Яла алши бумур шин?
– Арс увсса шин.
- 6. ВичIара циксса арцу хьувкун дигьаларгун дикIанссия вил дакI?
– Лажиннича, бюхъайссарив талихI арцуйну буцин? Хъинну авадансса инсантурал дянивгума чансса бакъар талихI бакъасса. Лайкьсса оьрму бутансса духьурча, гьассар, «кьарал» тIисса махъ ххуйсса махъри.
- 7. Инсаннал тахсирдавасса цумур тахсир хьунссия вища багъишла битан?
– ХатIа хIалану хьусса тахсир.
- 8. Бувагу къабитан?
– Хаиншиву.
- 9. Ссан диял къашай вил чIун?
– Гъанчувнал ялун-лув гьансса, ттунма дакIний ливчIсса луттирду буккинсса.
- 10. Бартлавгун ччисса вила шанма мурад?
– Дунияллий дакьаву, мачча-гъанцири цIуллуну-сагъну бушиву, хIасратрайсса цума-цагу инсан хъин ансса арцу паччахIлугърачIа диял шаву.
- 11. Вила оьрмулуву хъинну ххирасса кIантту бувгьусса инсантурал цIарду (нину-ппу къахIисавну)?
– Арс ва ванал кIива душ.
- 12. Винма ххуй бизайсса хъамитайпалул сурат.
– ДакI хъинсса, ас-ламус бусса, дурккусса, аькьлу бусса, зунттал ва европанал менталитет цанницIун ца даркьусса хъамитайпа. Мукунсса хъамитайпа бия Гулизар Султанова, аьпа биву.
- 13. Вина кьамулсса чув-адаминал сурат.
– Аькьлу, яхI, къирият, чувшиву дусса. Ттула лас Дибир МахIаммадов.
- 14. Агарда, бюхъайсса бивкIссания, инава ци кIанттай, ци чIумал бувну ва цумур билаятрай яхъанай ччива вин?
– Гъурбатрай къабувну, ттула аьрщарай зунттаву бугу-бувну, зунттал бюхттулшиврул ва кьункьал, ниттил мазрал ххуйшиврул ва пасихIшиврул дакI дурччуну яхъанан.
- 15. Ссаяту бикIай вил яла хъунмур пахру?
– Ттула миллатрал ва агьулданул лайкьсса лавгмуния.
- 16. Цукунсса дур вил виятурасса къарязишиву?
– Ттула цIуллу-сагъшиврух къулагъас дакъашивриясса.
- 17. Яла ххирамур дукра?
– Аьдатсса миллатрал дукрарду.
- 18. Яла къаххирамур дукра?
– Гречкалул каша.
- 19. Ссаятусса бикIай вил яла хъунмур хIучI?
– Ва зузнасса дуниял пана дан бюхъайсса иширттая.
- 20. Хьуссарив вил оьрмулуву винна инара ттинин багъишла ритан къахъанахъисса къел?
– Бюхъай хьуну дикIангу. Амма багъишла риртхьунссар, дакIний дакъания махъ.
- 21. Лавгзаманардавасса цIанихсса инсантурава цуманащал хьунабакьин ччива вин?
– М.Ю. Лермонтовлущал.
- 22. Цукунсса бур, вил пикрилий, лакрал миллатрал яла хъунмур буруккин?
– Ниттил маз бухлаглагаву. Лакрал миллатрал агьлу щала дунияллийх бивщуну бур. Амма, ци бухьурчагу, ми ,чIумуя-чIумуйн ватандалийн, аьзизсса зунттавун занагу хъанай, лайкьну оьрму бутлай ччива.
- 23. Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатран лавхьхьуну ялапар хъананшиврул?
– Мура му, аьрасатлувтурахунгу дахчилачимур. Мунин жаваб кIул хьунтIиссар Лакрал театрданул сахIналий Н.В.Гогольлул «Ревизор» спектакль ххал бувнугу.