Бадуржигьаннул цилвами оьрчIругу хъуни бувну, минналми оьрчIругу ччаннай бацIан бан кумаг буллай бур. Мурад ва Марина – Эльмирал, Гъазихан ва Мариян чIивимур душнил Альбинал оьрчIру, ларайсса кIулшивуртту ласлай бур. Мурад ва Марина дуклай бур Мединститутраву. Маринал школа мусил медальданий къуртал бувну бур.

Гъазихан дуклай ур Москавлий университетраву экономикалул факультетрай. Мариян, школагу арцул медальданий къуртал бувну, дуклай бур ДГУ-рал юридический ва Шяраваллил хозяйствалул институтрал экономикалул факультетирттай. Сяидлул чIиви Загьиди хъуна уллай, тарбия уллай бур ванал кулпат Альбина. Укун хIарачат бусса, бавкьусса, цахава лавхьхьусса бур ва жула ххаллилсса Бадуржигьаннул оьрчIал оьрчIругу.
Га ххаллилсса лакку кулпат­раясса махъ къуртал буван ччай ура ва кулпатрал гьану бивзун, муний цIакьсса къала бувсса Бадуржигьаннуя. Пенсиялийн був­ккун махъгу канил ка дургьуну щякъабивкIун, лагмаминнан мюнпатранмуниха зузисса ЧIяйннал «чемпионкая» ца кIива-махъ чивчуну. «КIанттул инсан ххуй къаайссар, инсанналли кIантту ххуй бувайсса» тIисса учала хъинну тIайласса бур. Мукун цуппа ялапар хъанахъисса кIану ххуй буллалисса инсан хъанай бур ЧIятусса жулва Рамазанова Бадуржигьангу.
Бадуржигьаннул оьрмулул хъунмур бутIа Каспийск шагьрулий лавгун бур. Ва, мяйжаннугу, бацIаву цирив къакIулсса, муданма кушу буллай аьдат хьусса зунттал инсан бур. Бадуржигьаннул дукIу ларгсса шинал Зумадугьай зуруй, дурну ниятгу циятура, цилва кулпатрая, уссурссунная ва гъанциринная, цуппа ялапар хъанахъисса Байрамовлул цIанийсса кучалий 6-чинми къатрал хьхьичI 16 метралул лахъисса марссагу бувну, цивугу ххуй-ххуйсса тIутIив дургьуну дур, буван, ялагу, оьрчIру бялахълансса къунгу бивну бурмайдан. Га площадкалул чIаравгу бивхьуну бур стол ва скамейкарду, оьрчIал ниттихъул щябикIан гай тIуркIу тIутIиссаксса хIаллай. Мукунма, 15-хъул шиннардил мутталий я шагьрулул хъуниминнаща, я лагма-ялттусса къатраву ялапар хъанахъиминнаща букьан къавхьусса Байрамовлул кучалий 6-мур ва 8-мур къатрал дянивсса ччюрклил бакIу марцI буван, ми ккаччал щалла хIаятравух ппив дуллай, мурдалшиву дусса кIанаву, оьрчIру, халкь заназисса хIаятраву дагьайкунсса марцIшиву дуван бювхъуну бур ванища. Бадуржигьан лавгун бур ЖЭК-райн, бувчIин бувну бур гайннан цинма ци бан ччай буссарив, гайнная цикIуйгу тIалав къадурну, я арцу, я кумаг. Цинма так ккаккан бара «мусорка» бансса кIану куну бур. Гайгу рязи хьуну, ихтияргу дуллуну, байбивхьуну бур мусор датIинсса къатта буллай. Цилалу бувну бур ххаллилсса песочница, оьрчIру бялахълансса, 16 метралул лахъишиврий дусса, щюллишиву ва тIутIив дугьансса марсса. Гиккугу жура-журасса тIутIив дургьуну дур. Яла-яла ванил, кьинил-кьинибархан, кIири бувсса бургъилух, зумагу дургьуну зий, цIинцI датIлансса къатта бувну бур, щилчIав кумаг къабувна. Га къатта бугу бувщуну, кIялагу бувну, щяв ххуйсса линолиумгу бувтун, нузкьунттивгу дирхьуну, щаллу бувну бур. Яла цилла арцух Бадуржигьаннул машан лавсун бур хъунисса пластмасс­рал ящикру. Гай бивхьуну бур къатлул кIирагу чулух чIирацI. Гайннуйгу чивчуну бур цумунивун ци дичинтIиссарив: цаннивун – пюрундалул банкIарду, гамунивун – пластмассрал шушри, кияха цалчинмунивун – ччатI, кIилчинмунивун – тIахIни-кIичIу, тайминнувун – усру, янна. ЧIирайн лархъун дур вешалкарду, цанна къааьркинсса пальто, плащ мумур-тамур лахъан. Га къатлун дурсса ххуйсса нузал кIирагу чулух чIирай лачIун дурну дур ххуйну чирчусса реклама. Къатлуя шихунмай бивхьуну 3 муххал контейнер, ялтту авурну кIюласса тахтардал бугу бувщуну, ччюрк дичин. Танийгу чивчуну бур цумунивун ци дичинтIиссарив. Ва даву дурну махъ Бадуржигьаннул чивчуну баян буллалисса чагъарду, гай чагъардугу кIирайрагу къатрал 12-вагу подъездраву лачIун бувну бур, гиву ялапар хъанахъиминнан цанна аьркин дакъасса, зия хьусса, дух хьусса янна-ус, ай-тай, ччатI чун ци дичин аьркинссарив. Ванил буслай, дартIсса янна-ус, цамургу цанна аьркинмур ласун бучIайсса бур шагьрулуву щюллишиву дугьлагьисса, къатри дуллалисса ва цайми кIанттурдай зузисса инсантал. Аьркиннал аьркинмур, чIатIуя тIайла хьуну, ларсун, цихьгу барчаллагь увкуну, лагай тIар. Гай кIирайрагу къатрал дянивсса ччюрк дукьан, 15 шинай я шагьрулул хъуниминнаща, ягу шикку ялапар хъанахъиминнаща дан къархьусса даву ванил циллалу щаллу дунни. Вана укунсса «кьянкьуш» бур ва жула ЧIяйннал «чемпионка». Вай цимурцагу дурну дур цила пенсиялул арцуцIух. Хъирив шиккун бувкIун бур «Кас­пийск»-ТБС, телевизорданувух ккаккан дан ванил дурсса даву, яла бувкIун бур «Дагестан» РГВК-лия. Ставрополлая бувкIсса агьали, хъунмасса барчаллагьгу увкуну Бадуржигьаннухь, ванил дурсса цимурцаннул суратругу ларсун, укунсса даву жучIарагу дуванну тIий, хъинну рязийну лавгун бур. Га цалла дурсса съемкагу ккаккан дурну дур цачIара «Самая лучшая мусорка» тIисса передачалуву. Интернетраву, Ютубраву дуссар му, ххалдан ччинан, «Самая лучшая мусорка, в сентябре 2014 года» тIисса съемка.
Укунсса, цуппа ялапар хъанахъисса кIану ххуй буллалисса, инсан бур Рамазанова Бадуржигьан. Ва макьала къуртал дуллай, учин ччай ура: Я Раппий, я Аллагь, укун ххаллилсса, дакI марцIсса, цала лагма-ялттусса агьалинан хъинбаларду буван ччисса, хаснува жулва лакравасса вирттал гьарза хьуннав, ми чан къабаннав жулва чIарав бацIан ва укун захIматсса чIумал. Ялув­сса хъуниминнангу хъин чулий дакIнийн багьаваннав укунсса инсантурахь бачIвасса барчаллагьвагу учин, лавгун бурувгун, ххал дурну ци даву дурну дурив, дурсса даврин кьиматгу бивщуну, цалла совещаниялийвагу, гай цалва каялувшиннаралусса зузалтрахьвагу кIицI лаган цалва дянив укун ххаллилсса агьлу чансса бакъашиву ва жува циняв гайннан кьадру буну бикIан аьркиншиву, гайннаяту ласаван эбрат ва цачIарагу, цивппа яхъанахъисса кIанттурдайгу дуван укунсса давурттив, жулва шагьру марцIну бикIаншиврул.
Ина кунмами чIяву баннав, Бадуржигьан.