Жуна ххирасса ппу Ханов Зайнуттин дакIнийхтуну барча уллай буру юбилейращал. ЧIа тIий буру вин цIу­л­лу-сагъшиву, давриву тIайлабацIу.Я Аллагь, Вил дакIнийсса циняв мурадру бартлаганнав. Оьрмулия щалихханнин итаннав ина жул дадащал, ахир хайрданийн дукканнав.
Виха дуаьлийсса вил кулпат, душру, куявтал ва миннал оьрчIру

—————————

Ххирасса уссу Зайнуттин!
Жу циняв, вил гъан-мачча­ми, хъунмасса гъираращал барча ан ччай буру ина ниттил увну 60 шин шаврил байрандалущал!
Оьрмулул дайдихьулия айивхьуну, ина бувтунни жун, циняв уссурссуннан, дакI мяшну, цила багьайсса куццуй, зунтталчунал оьрму.
Ина хъунмасса захIмат був­ссар ниттищал колхозравугу зий, ххуйну школагу къуртал бувну, лажин кIялану армиягу лавхъун, къуртал бувссар Ростовуллал экономикалул институт. Ци даврий зурчагу, ина ккаккан бунни ччарча хъуниминнан, ччарча архIал зузиминнан вилла марцIшиву, вилла тIайлашиву, вилва гьунар.
Вания тинмайгу лажин кIялану оьрму бутан Аллагьнал вихьхьун цIуллушиву дулуннав, вил ялату Аллагьнал цIими чан къабаннав, вила кулпатрал, душваврал, оьрчIал лахъисса оьрмулий ххари уллай ккакканнав. ЦIусса шингу жунна цинявннан барачатращал дуркIун лякъиннав. Амин.
Циняв уссурссуннал чулуха, хIурматращал
МахIанмад-хIажи,
ш. Ростов

————————

Жул аьзизсса дядя Зайну­ттин!
ДакIнийхтуну барча дуллай буру вил юбилей. Ина мудангу мукуна зирангнува, аьчухна, тяхъанува личIаннав. Хъинну чIяруссар жул вицIун дархIусса оьрчIнийсса ххаришивуртту. Жу оьрмулухун вийн барчаллагьрай буссару. ДакIнийссар Ростов шагьрулийх буллай бивкIсса сайрду ва ичIувасса мажлисру. Жу хIакьинусса кьинигу ядуллай буссару ина жун 40 шинал хьхьичI Германнава ларсун увкIсса сувенирду. Ина мудангу кIидачIара жул ххари-шадшивуртту, захIматшивуртту. Барчаллагь вин мунихлуну хъунмасса! Вингу, вил ххаллилсса кулпат Ссапижатлунгу, душварангу, оьрчIал оьрчIангу цIуллушиву, хъиншиву! Жун ина акъа чара бакъассара! Ина ушиву – му жунсса талихI бушивур.
Ина ххирасса
Надя ва Аьжа ва цинявппагу жул ичIувами. Москав,
январь 2015 ш.