Гьарцагу нитти-буттал цалва оьрчIал цIаний бивхьусса гуж-захIмат ми ччаннай бавцIуну, халкьуннавун буккай хьувкун тIайла бацIайссар, бувмур аьдада къалавгун, бакIуйн буккайссар учай. ЦIана нажагьсса кулпатру бакъа-бакъар я магьирлугърахун, я спортрахун ягу цалла дакIнил ларсъсса цамур сянатрахун машхул хьусса, магьирлугърал школардайн ва спортзаллавун оьрчIру заназисса.
Дагъусттан машгьурсса лачIунбуккултрал ва боксертурал кюру бухьувкун, жулва оьрчIаву спортрал вай журарду бусравну душиврий цичIав махIатталшиву къадикIай. МахIаттал шаракьай на лачIунбуккаврия ва боксрая архсса спортрал цайми журардаву Аьрасатнал цайми шагьрурдай гьунар, хIарачат буминнавух да­гъусттанлувтурал фамилияртту ялун личлай хIисав хьувкун.

Залму АьбдурахIманова
Цаппара шиннардил хьхьичI жул кказитрайгу буссия чIал къавхьуну фигурный катаниялул пьедесталданий лайкьсса кIану бугьантIисса жула лакку оьрчI Мурад Кьурбановлуя ва спортраву мунал буллалисса хIарачатрая, хьхьичIуннайшивурттая бувсун. Уттигъаннурив на кIул хьура Москавлив ялапар хъана­хъисса жула лакку оьрчI, спортрал къавтIавурттаву гьунар бусса, машгьурсса тренертурал къулагъас дурсса Мурад МахIаммадовлущал. Мурадлул ппу Мурадели, КIамахъалиясса Хан-МахIаммадлул ва КIулу­шацIатусса Умаматлул арс ччянияцIава ишбажаранчишиврухун агьсса, Москавлив цалла бизнес дусса, хIарачат бусса инсан ур. Ванал кулпат Динара КIулушацIатусса АьбдулхIамидлул ва Хъювхъатусса Зулмирал душ бур. Москавлив ялапар хъанай вайннал ацIнияхъайсса шинну хьуну дур. Мурад дуклай ур Москавуллал №1981 школалий 5-мур классраву. Нитти-буттал бусаврийну, цIубакIрай оьрчI цанма гъира багьну занай ивкIун ур каратэлийн. Ва спортрал журалул кружок дакъасса, Мурад дуклакисса школалий оьрчIаву гьунарду ялун личин буллалисса, магьирлугърацIун, элмулуцIун, тIабиаьт ххал дигьаврицIун дархIусса кружокру чIярусса дусса дур. Каратэлийн занай 3 шин хьуну махъ, тренировкардая шавай нани ххуллий бальный къавтIавуртту нанисса залданувун ухлай, гиву аглан хъанай, къавтIутIисса оьрчIай тамашалий лякъайсса ивкIун ур арснал хъирив бувкIсса Динаран. Телевизорданул, компьютерданул хьхьичI щяивкIун чIун аьдада гьан дуллаяр, ца-кIива зуруйсса ухьурчагу, цалла цIуллу-сагъшиврунгу хай­р­сса сянатрахух лавгун хъиннича тIий, нитти-бутталгу машвара бувну бур арснан ччимур буван. ЧIун наниссаксса оьрчIавун хъиннува гъира багьлай, спортрал балданул къавтIавурттал кружокрая пишакарсса къавтIалт хIадур байсса клубравун занази хьуну ур.
Утти спортрал тIий ялун­сса цIа дизарчагу, балданул къав­тIавуртту хъамитайпа ва адамина чутну къавтIун бизайсса, аьвзалзаманнай авадан къатраву, аристократътурал дяниву машгьурну диркIсса, цIана хъунмасса тарих бусса къавтIавуртту хъанай дур. Ми дусса дур кIира журалул: европанал программа – хIаллихсса вальс, танго, венский вальс, фокстрот ва квикстеп къавтIавуртту ва латиноамериканал программа – ча-ча-ча, самба, румбо, пасодобль ва джайв. Вай къавтIавурттал клубирттал дяниву бикIайсса бур спортрал журардая махъун къабагьсса, хъинну бусравсса жюригу бусса, цукунчIавсса гъалатIру хIисавравун къаласайсса, личIи-личIисса даражалул бяст-ччаллу. Цаппара шиннардил хьхьичI Олимпий тIуркIурдал дунияллул халкьуннал Комитетрал сипталий олимпий тIуркIурдал сияхIравун вай спортрал къавтIавуртту ласунсса пикри бусса бур.
Спортрал къавтIавурттайн заназисса цалчинсса шинал Мурадели ва Динара бивкIун бур арс бизар хьуну каратэлийн махъунай кIункIу хьуннин ялугьлай. Мурад тIурча ялу-ялун къавтIавурттахун лаглай, Щалва Аьрасатнал категориялул машгьурсса тренер Юрий Лыковлул итталун агьну ур. Юрий Ивановичлул пикрилий, вава куццуй спортрал къавтIавурттаву укунсса хIарачатру булларча оьр­мулул 15 шинаву Мурад кунмасса оьрчIан дулайсса дур спортрал мастернал цIа.
Уттинин Мурад гьуртту хьуну ур Москавлив шайсса спорт­рал къавтIавурттал клубирттал дянивсса чIярусса турнирдай. Ларгсса шинал Москавлив хьусса щалва Аьрасатнал конкурсрай Мурад ва ванащал къавтIисса Олеся Голубенко цалчинмур кIанттун лайкь хьуну бур. Шикку гьуртту хъанай бивкIун бур билаят­раясса 26 чут (пара).
Ва конкурсрая махъ Мурадлуйн ва Олесайн оьвкуну бур гьар шинах Москавлив шайсса Венский бал тIитIлатIисса шадлугърайн. Балгу тIивтIуну бур хьхьичIва-хьхьичI залданул дянивун вайннал чут буккан бувну, Чайковскийл макьандалийсса вальс щаллу даврийну.
Спортрал балданул къавтIавур­ттаву дусса дур чIявусса оьрчIал дукъахIайсса захIматсса шартIру. Масалдаран, оьрчIахь дусса дур шанна-мукьра шинал дяниву дурсса къавтIавурттахлу лавсъсса баллах бурувгун махъ фрак лаххансса ихтияр. КъавтIавурттал 4-мур классраву латиноамериканал къавтIавуртту дайдишай­сса духьувкун, тIалавну бусса бур чан-кьансса загар дуван. ДушварачIанми тIалавшиннарду лап чIярусса дусса дур: кIиз ма­хъун бавтIун, къутта дуван, чур­ххал базу къачIалачIисса лахъи­сса гьухъа лаххан, лажиндарай цичIар косметика къадикIан, гьухъуй цIай-цIай тIисса ашрапиртту, му-та ларчIун къадикIан.
Гьарца зурул ахирданий клубирттал дянив бувайсса бяст-ччаллай ялун личайсса бур яла хасиятрал кьянкьами, гьунар буми, мяйжаннугу цала язи дургьусса сянат ххирами оьрчIру. Ца мукунсса бяст-ччаллий ларгсса шинал телевизорданувух най диркIсса «Танцы со звездами» тIисса передачалул гьурттучитуращал зузисса, миннан къавтIун лахьхьин буллалисса ва ялувгу кIицI лавгсса тренер Юрий Лыковлул итталун агьну ур жула ла­кку оьрчI Мурадгу. КъавтIавурттал «С» класс бувккуну махъ, Мурадлухь мюрщултран къавтIун ла­хьхьин буллансса ихтияр дусса дур. ЦIана ва усса ур «Д» классраву.
Спортрал къавтIавурттаву хIарачат буллалаврицIун, Мурад ур марцIну ххювардай дуклайгу. Ванал хъунама уссу Тимургу ур вава школалий 7-мур классраву ххуйсса кьиматирттай дуклай. Тимур машхулну усса ур футболданухун.
Мурадлул хиялгу бур «Russian Open» тIисса Аьрасатнал хъунна­сса Чемпионатрай гьуртту хьунсса. Ванан бусравсса, эбрат ласласи­сса къавтIалагу ур дунияллийх цIаларгсса, чил билаятирттал къавтIавурттал клубирттаву бусравсса Андрей Гусев. Унгу-унгу­ну цалва хиял дузрайн буккан бан кьаст лархIуну чIалачIисса цала арснацIун кабакьу буллай бур Мурадели ва Динарагу. Динара бур арснал шаппасса тренергу, судьягу, тамашачигу.
«Спортрал къавтIавурттаву за бувчIайсса, ттуршахъул пишакартал, тренертал, судьятал, тамашачитал, чIава гьурттучитал, миннал нину- ппу бавтIсса залдануву ведущийнал лахъну цал оьрус мазрай, яла ингилис мазрай бяст-ччаллаву гьуртту хъанахъиминнал фамилияртту баян буллалийни «МахIаммадов Мурад» тIисса цIа тIутIийни аьжа­ивсса гьавас буххай, чурх синс ликкай», — буслай бур Динара.
Мурадлунгу, цалва язи бувгьусса хиял бартлаганнав тIий, чIа учин ччай бур спортрал къавтIавурттугу Олимпий тIуркIурдал сияхIраву цIакь дурну, микку гьуртту хьунсса цIуллушиву ва тIайлабацIу!