Августрал 3-нний хьунни коронавирусрал инфекциялийн къаршисса Оператив штабрал батIаву.
Муний ххал бивгьунни республикалий санитар-эпидемиологиялул тагьарданул, ковид-19 ппив шаврил хьхьичIалу кьукьинсса чараннал, агьалинайн вакцинартту баврил ва цаймигу масъалартту.

Республикалул каялувчинал тIимунийну, гьарца кьини ашкара хъанай ур коронавирусрал къашавай хьусса 200-250 инсан, азарханардай уттуишин уллай ур ца кьини коронавирусрал ва пневмониялул увгьусса сайки 450 инсан. Майрая махъ азарханардай му цIуцIаву дирсса гьарза хьуну бур 8,5-ла.
Сергей Меликовлул бусаврийну, ялу-ялун чIяву хъанай бур вакцинартту буллалими. Так ца июльданий ххалаххив бувну бур 100 азарунная ливчусса инсантурал, ягу дянивну лавсун, ца кьини 3000 инсаннал.

Республикалий июльданул 21-нния шинмай чара бакъа­сса вакцинарттал ххалаххив буван аьркиншиву баян бувну бур чIявусса инсантуращал хьунабакьайсса пишалул инсантурайн. Аьрасатнал Роспотребнадзорданул ва Минтрудрал бувчIин баврийну, азарданул чулуха­сса тагьар цалий дацIаншиврул, коллективраву иммунитет хьун дуван аьркинну бур 80% зузалт­рал.
Вакцинартту буван аьркинсса инсантурахь ихтияр дур ххалаххив баврия инкар хьун, амма му чIумал аьркинссар ми давурттая букьан буван.

Оперштабрал батIаврий санитар-эпидемиологиялул тагьардания бувсунни ДР-лул Роспотребнадзорданул управлениялул каялувчи Николай Павловлул.
Мунал тIимунийну, августрал з-ннийнин Дагъусттаннай сияхIрайн лавсун ур 24 315 коронавирусрал къашайшала, махъсса гьантлий тIурча 198.
ЧIявусса инсантал къашавай хъанай тIий, Николай Павловлул лахъи лаган дурунни цаппара ссуссукьушивуртту.

Миннувасса ца хъанай дур 65 шинавун бувхсса ва миннаяргу бугьарами инсантал самоизоляциялул низамрайн бучIаву. Даврийн занан бучIину бур так ххалаххив бувшиврул хIакъиравусса сертификат думиннан.
Къашавай хьуми хъин буллай бушиврул хIакъираву ихтилат бунни ДР-лул цIуллушиву дуруччаврил министр Татьяна Беляевал.
БатIаврий ххал бивгьунни мукунма цаймигу масъалартту.