Гьарца шинах жула билаятрал цIусса тарихрал гьану бивзния шинмай июньдалул 12-нний кIицI лагайссар Аьрасатнал Кьини. Ва хъанахъиссар цIусса хIукуматрал ца яла жагьилмур байран.
Ванил тарихгу хIасул хьуссар 1990 шинал РСФСР-данул халкьуннал депутатътурал цалчинсса съездрай кьамул дурсса Аьрасатнал суверенитетрал Декларация цIакь дурния шиннай. Га съездрай хIукму бувну бивкIссар билаятрал агьаммур закон Аьрасатнал Конституция душиву.
ЦIуну кьамул дурсса Конституциялийн бувну, гания гихуннай циняв аьрасатлувтурал, политикалул партиярттал ва жяматийсса сакиншиннардал ихтиярду архIал дацIан дурссар, автономсса республикарттал, крайрдал, областирдал ва округирттал ихтиярду ва чаранну гьарта-гьарза бувссар. Цалийн дурцуссар законодательствалул, судрал ва исполнительный властьрал кьанунну. ХIасил, закондалийн бувну, цимурца даххана дурссар.
ЦIусса Конституциялийн бувну билаятгу баян бувссар Аьрасатнал Федерация тIий.
1991 шинал июньдалул 12-нний Аьрасатнал тарихраву хьуссар цалчинсса халкьуннал дянивсса билаятрал президент увчIлачIисса бувчIавуртту. Микку ххувгу хьуссар Борис Ельцин.
1992 шинал Аьрасатнал Федерациялул Верховный советрал хIукмулийну тарихравун ларгсса гай бувчIавуртту хьусса июньдалул 12-сса кьини баян бувссар байрандалул кьинину. 1994 шинал Аьрасатнаву ва кьини баян бувссар паччахIлугърал байранну.
«Аьрасатнал Кьини» тIисса ва официалсса цIагу байрандалуцIун дархIуссар 2002 шинал АьФ-лул ЗахIматрал кодекс кьамул бувну, ганий циняв байраннал гьантри ва бигьалагай кьинирду ккаккан дурну махъ.
