Сентябрьданул 3-нний Дагъусттаннал БакIчи Рамазан АьбдуллатIипов кIул хьунни МахIачкъалаллал аэропортрал самолетру леххайсса ва ликкайсса ххуллу (полоса) цIубуккан буллалисса давурттащал. Ми давуртту къуртал хьуну махъ аэропортрай ликлантIиссар «Аирбус 320», «Боинг-757» ва «Ил 86» журалул гьавалул жамирду.
Тикку дуллалисса давурттал хIакъираву Республикалул БакIчинахь бувсунни ДР-лул Ххуллурдал агентствалул каялувчи Загьид Хучбаровлул, «Мостоотряд-99» ОАО-рал гендиректор Аьли ГьитIиновлул, аэропортрал реконструкциялул проектрал каялувчи Идрис Аьлиевлул, «Аэропорт Махачкала» ОАО-рал гендиректор Темирлан Бугъановлул.
Журналистътуращалсса ихтилатраву Рамазан АьбдуллатIиповлул бувсунни: «Жу чIярусса шиннардий хIарачат буллай буссияв вай давуртту дуван. Аьрасатнал Президент В.В. Путиннулгу, ХIукуматрал Председатель Д.А. Медведевлулгу, транспортрал министр М.Ю. Соколовлулгу кумаграйну жуща бювхъунни ва проект арцул щаллу дуван. Тендер дурххунни Дагъусттаннал ххуйсса компаниялул. «Сумма» группалул лавайсса даражалий дайссар давуртту, ХIукуматрал чулухасса контроль буллалиссар лавайсса даражалул пишакар Загьид Хучбаровлул».
Дагъусттаннал БакIчинал мукъурттийн бувну, аэропортрай, реконструкциялул давурттащал архIал, буллан най бур Дагъусттаннал авиакомпаниягу. Ва хьун тIий бур билаятрайсса яла ххуйми авиакомпаниярттавасса ца.
ХIадур бувссар ХI. Аьдиловлул
