Ларгсса тталаткьини Дагъусттаннал паччахIлугърал медициналул университетрал ректор Сулайман Маммаевлул Ватан дуруччайминнал байрандалущал барча унни ветеран, цIанихсса кардиолог, медициналул элмурдал доктор, госпитальданул N1 терапиялул кафедралул профессор, Щайхлул арс АхIмад Хасаев. Ва кьини жулва билаятрал тарих захIматрайну ва бюхъу-гьунардайну гьаз бувсса ветерантал барча бувайсса аьдат цIакь хьуну душивугу к1иц1 лавгун, барчаллагь кунни медициналул ва фармацевтиялул ххаллилсса пишакартал хIадур бавриву биялсса бутIа бивхьусса ва жагьилсса хIакинтуран мудангу кIулшивуртту куртIгу, цIакьгу дуван кумаг буллалисса АхIмад Хасаевлухь.
Увну ур АхIмад Хасаев 1933 шинал ЧIурттащиял шяраву. 1956 шинал Дагъусттаннал медициналул институтгу къуртал бувну, Гергебильлал гидроэлектростанциялул азарханалул хъунаману зун айивхьуну ур, микку зий унува ординатуралувугу ккалай. Яла Буйнакск шагьрулул азарханалий терапевтиялул отделениялий каялувшиву дуллай ивкIун ур. ХIакинну зий унува медициналул элмулухунгу агьну ур. 1963 шинал зун ивкIун ур госпитальданул терапиялул кафедралул ассистентну, студентътуран кIулшивурттугу дуллай, элмурдал кандидат хьунсса диссертациягу хIадур дуллай. 1967 шинал дурурччуну дур медициналул элмурдал кандидатнал диссертация, цаппара шиннардива тIурчарив – элмурдал докторнал диссертациягу. Профессор АхIмад Хасаев Аьрасатнал ва кьатIаллил билаятирттал сий дусса медициналул журналлайсса кIиттуршунниха лирчусса элмийсса давурттал автор ур. Ванал хIадур бувну бур ацIунниха ливчусса элмурдал кандидатътал. Дагъусттаннал лайкь хьусса хIакингу, Дагъусттаннал лайкь хьусса элмулул ишккаккугу ур. Аьрасатнал кардиологтурал ккурандалул членгу ур. Лавайсса даражалул аьлимчу-педагог хIисаврай акъассагу, цала миллатрал ва Дагъусттаннал тарихгу, культурагу ххуйну кIулсса, хъунасса патриотгу ур Хасаев.
Жугу дакIнийхтуну барча уллай буру хIурмат лавайсса хъуначу- профессор, бусравсса наставник, агьалинал цIуллушиврул къайгъулий оьрму бувтсса ва гьарца ишираву жунагу эбратрансса АхIмад Щайхович. ЦIуллушиву дулуннав, наслулул ххари улланнав!
