ИхIсаниятрал концерт

Республикалул Халкьуннал творчествалул къатлул сипталийну Кулпатран ва оьрчlан социал кумаг баврил центрданий хьунни Ватан дуруччултрал кьинилун хасъсса ихlсаниятрал концерт.

Шадлугърал тамашачитуравух бия личlи-личlисса оьрмурдал оьрчlру. Концерт дайдишин хьхьичl оьрчlал дянив хьунни спортрал бяст-ччаллийсса тяхъасса тlуркlурду.
Концертрал программа «Катюша» балайлийну дайдирхьунни Центрданул тарбиячитурал.
Концертрай мукунна гьур­ттушинна дурунни Республикалул Халкьуннал творчествалул къатлучlасса оьруснал балайлул «Волна» цlанилусса хорданул солистътурал, Хиринду Султlановал, Нурият Оруджевал.
Ахирданий ЦСПСиД идаралул директор Написат Ших­аьлиевал, бавтlми байрандалущал барчагу бувну, Республикалул Халкьуннал творчествалул къатлуйн барчаллагь баян бувна.