Тталаткьини, декабрь зурул 8-нний, «Дагестан» РИА-лий хьунни Дагъусттаннал юстициялул министрнал хъиривчу Сергей Караченцевлул пресс-конференция. Сергей Караченцевлул бувсунни ци чаран ляхълай буссарив цала министерство коронавирусрал инфекция ппив къахьун, муния агьали буруччин.
Ванал бусласимунийн бувну, коронавирусрал инфекция ппив къашаву мурадрай сакин хьусса оператив штабрал хIукмулийну, Дагъусттаннай декабрь зурул 2-нния байбивхьуну магьар бихьлахьисса чIумал ЗАГС-рал къатравун буххан битлатиминнал ккал чан дурну дур. Утти, Аьрасатнал хъунама санитар хIакиннал маслихIатрайну, магьар бихьлахьисса кIанайн 10 инсаннаяр ххишала буххан къабитлан тIий бур.
– Жу маслихIат буллай буру магьар бишин ччиминнан ЗАГС-рал органнащалсса дахIаву электрон почталийх ягу паччахIлугърал хIаллихшиннардал порталданийх дуван. Жу ххал бигьинтIиссар цинявппагу мукун бувкIсса аьрзри ва чара бакъа миннун жаваб дулунтIиссар, – увкунни Сергей Караченцевлул.
Ва бакъассагу, коронавирусрал инфекциялия бурувччуну бикIаву мурадрай, ЗАГС-рал гьарица залдануву дирхьуну дур дезинфекциялун аьркинмур, тIалавшинна дур шиккун бувкIми кувнная кув манзилданий бацIансса. Сергей Караченцевлул бувсунни, коронавирусрал «цалчинмур щатIи» бивщусса чIумал, Юстициялул министерствалул чулуха цIананияр кьянкьасса тIалавшиннарду диркIшиву, амма, цаппарасса мютIи бакъа, ми щаллу къадуллай бивкIшиву.
– Цал-цал, магьар бишин бувкIминнал гъан-маччами паракьат бан, жун полициялул зузалтрайн оьвтIунгума багьайва,–тIий ур С. Караченцев.
Ихтилат къуртал хьуну махъ ванал журналистурал суаллахьхьун жавабру дуллунни.
