Декабрьданул 9-нний ДР-лул Экономикалул ва территориал лябуккулул министерствалий хьунни жулла республикалий яла анаварну ва мюнпат буну зузисса МФЦ язи бугьлагьисса конкурсрал хIасиллу дуллалисса шадлугъ.
МФЦ-рдал зузалт барча буллай, ДР-лул экономикалул министр ХIажи Султановлул кIицI бунни МФЦ-лул филиаллал даврин кьимат бишлашисса конкурсрал ялунгу гиву зузисса пишакартурал бюхъу-хIарачатрал даража лахъ буллалишиву. Мукунма ванал барчаллагь баян бунни цала зузалтрайн, пандемиялул чIумал агьали цила чIумал хIаллихшиннардал дузал буллай, низам лиян къадурну, зий бивкIун тIий.
«Республикалул циняв МФЦ-рду зий бивкIунни ца кьаралданий, цуппа ца ишираву аьй къахьунну. Зул биялалий бия чIявусса оьрчIру бусса, мушакъатсса инсантал яхъанахъисса, льготарду ласайсса, ахIвал-хIалданул кIюласса кулпатру аьркинсса чагъардал щаллу баврил масъалартту. Зу зуйва бивхьусса бурж лажин кIялану биттур бунни», – увкунни ХIажи Султановлул.
Ванал бусаврийну, республикалий ххув хьусса МФЦ-рду утти тIайла буккантIиссар гьуртту хьун федерал даражалийсса конкурсрайн.
Дагъусттаннал цинявгу МФЦ-рдал каялувчи МахIаммадамин Арсланаьлиевлул кIицI бунни ва шин дайдирхьуния шинмай МФЦ-рдай агьали дузал бувшиву 2 миллиондалийн бивсса хIаллихшиннардал. Миннува хIукуматрал ва муниципалитетирттал хIаллихшинна бусса бур 1 миллион ва 647 азаруннийн бивсса. МФЦ-рдайн хIаллихшиннардал хъирив бувкIсса агьалинахь бувсса цIухху-бусулийн бувну, 5 баллданува вайннал даврин кьимат бивщуну бур 4,65 баллданун.
Ихтилатирттая махъ хьунни конкурсрал номинациярттай ххув хьусса МФЦ-рдал цIарду ришлашисса бутIа. «Яла ххуйну хIукуматрал ва муниципал хIаллихшиннарду дузал дурсса» тIисса номинациялий ххув хьунни 20-ннияр ххишаласса «чIавахьултту» бусса категориялувасса Хасавюртуллал МФЦ.
«Яла ххуйну зузимур МФЦ» тIимур номинациялий 20-ннияр чансса «чIавахьултту» бусса категориялул МФЦ-рдаву 1-мур кIану бувгьунни Буйнакскаллал МФЦ-лул, 2-мур кIану – Къизилюртуллал МФЦ-лул ва 3-мур кIану бувгьунни Дахадаевуллал райондалийсса МФЦ-лул.
«Яла ххуйну зузима пишакар» тIисса номинациялий 1-мур кIану бувгьунни МахIачкъалаллал Кировский райондалул МФЦ-лул оператор МахIаммадова Сабиятлул, 2-мур кIану- Хасавюртуллал МФЦ-лул оператор ХIусайнова Зулайлул ва 3-мур кIану- МахIачкъалаллал Кировский райондалул МФЦ-лул оператор Бадруттинова Марияннул.
