Сентябрь зурул 30-нний Дагъусттаннайн увкIунни Аьрасатнал ФСИН- далул директор Александр Калашников. Вара кьини ва хьунаавкьунни Дагъусттаннал хъунама Владимир Васильевлущал ва гьаз бунни дуснакьрал даврицIун бавхIусса агьамсса масъалартту. Васильевлул кIицI лавгунни Дагъусттаннал хIукуматрал ва Аьрасатнал ФСИН- далул мюнпатсса хIала- гьурттушиву душиву, уртакьну зийгу бушиву, лахъсса кьимат бивщунни вай гьантрай Дагъусттаннал колониялува ливхъсса преступниктал бувгьусса структурардан. Республикалул хъунаманал гьаз бунни дуснакь бувми захIматрахун машхул баврил масъалагу.
П. Рамазанова
-Региондалий маскарду диял къахъанахъисса аварасса ппурттуву дуснакь бувминнахь маскарду, СИЗ-ру дурухлахи бувну, даву сантирайн рутан кумаг буваврихлугу барчаллагь. Дуснакьраву захIмат буллали буваву миннан цанмагу, жяматрангу хайрданунссар, — увкунни Владимир Васильевлул. Ванал мукунма бувсунни танмихI лахълахъими зунсса личIисса центр буван дакIний бушиву ва мунинсса зданиягу хIадурну душиву, чIал къавхьуну микку ремонт дуллай байбишинтIишиву.
Вара кьини Александр Калашников ивунни дуснакь бувми бусса кIанттурдавунгу, ялтту увккунни изоляторду , циняв корпусру ци тагьарданий бурив ххал буллай. Ивунни усру дувай цехравунгу. Бунни даву сантирайн рутаврил хIакъиравусса цаппара маслихIатру.
