ШАГЬАБУТТИННУЛ ДУШ ХIАЖИЕВА НУРИЖАН
Вай гьантрай дунияллия лавгунни Ккуллал ва 1-мур ЦIувкIуллал шяраваллал язисса хъамитайпа, Шагьабуттиннул душ ХIажиева Нурижан.
Лавгунни цила ласнал, лакрал миллатран ххуйну кIулсса чичу ва тарихчи Дундар ХIажиевлул, хъирив анавар бувксса кунма. Бувссар Нурижан 1-мур ЦIувкIрав 1936 шинал, ацIва оьрчI бусса Шагьабуттиннул ва СахIибатлул кулпатраву.
Ва чIивисса ппурттуву бивзун бур вайннал кулпат ЦIуссалаккуйн. Шагьабуттин ЦIуссаккулув колхозрал председательну тIайла увккун ур. Нурижаннул Хасавюртлив педучилище къуртал бувну бур, яла – пединститутрал филологиялул факультет. ЦIуссаккулув зий бивкIун бур учительницану, МахIачкъалалив бизайхту – садикрай тарбиячину. Нурижан буссия дакI-аьмал хъинсса, инсантал цичIанма кIункIу буллалисса, учайсса мукъуй цIу бусса, пиш тIий бакъа инсаннащал зума къабахъайсса, хъамал ххирасса ва ялун увкIнаха хIурмат буван кIулсса хъамитайпа. ЦIуссаккулувгу, МахIачкъалаливгу вайннал ужагърая хъамал чан къашайссия, кIулцириннан ва ххирассия.
ДакIнихтунусса кьурчIишивугу кIидачIлай, жижара буллай буру арсурваврахь ХIажинахь, Рамазаннухь, душваврахь Аминатлухь, Саидатлухь, Марианнахь, вайннал наслулухь, агьлу-авладрахь, уссихь Сайдуннухь, ссурваврахь ПатIиматлухь ва Аьйшатлухь. Алжаннул багъирдаву Аллагь рязиминнавух паракьат хьуннав зума дугьай зуруй оьрмулува лавгсса Нурижаннул рухI, гьаттай нур дизаннав, махънахьхьун цIуллушиву дулуннав!
ЦIуссаккуллал
ва 1-мур ЦIувкIуллал жямат
ДакIнихтунусса кьурчIишиву кIидачIлай, жижара буллай буру лакрал миллатрангу ххуйну кIулсса Дундардул душ Кьурбанова Саидатлухь, ванил ххирасса нину
Шагьабуттиннул душ ХIажиева Нурижан
дунияллия лагаврийн бувну. Нурижаннул барачат махъ ливчIун лякъиннав, алжаннул ххари буваннав, гьаттай нур дизаннав!
М. Илиясовал цIанийсса «Дараччи» фонд
МАХIУЛ ДУШ КАМИЛОВА ПАХАЙ
Ва хар-хавар бакъасса лухIи балаллул щавщи Ккуллал шяраваллил жяматрайнгу бивну, цимиягу ххаллилсса инсан оьрмулуцIа унни.
Вай гьантрай мукунма жуятува личIи хьунни хIакьсса лакку хъамитайпа, цIанихсса жанги – балайчи, къавтIала, захIматчи Камилова Пахай (ПитIирхъал Пахай).
Пахай бувну бур 1932-ку шинал Ккуллал шяраву. Ппугу ччяни яла лавгун, ца ниттихун багьну, хъунмасса кулпатравусса Пахайн духIан багьну бур цикссагу захIматшивуртту. Ва зий бивкlссар колхозравугу, дурссар дояркашивугу.
Пахай бия Ккуллал шяраваллил хъатIал, цаймигу мажлисирттал, тяхъашивурттал сиптачи – сакиншинначи, балайчи. Ххирая ва гъан-маччанан, бусравну, лавайсса хIурматрай бия жяматраву.
Пахайл, кулпатрал хьуну, циявасса аьпалунсса оьрчI бансса бахтти- талихI къахьурчагу, хъунмасса кумаг бувссар уссил оьрчIру-душру хъуни бан, циламиннаха куннасса аякьа дурссар миннаха. Вайнналгу ванил, хъунмасса хIурматрай, аякьалий, дакIнихтунусса кьадру-кьимат бувссар. Хъинну къуману, бухIан къашавай бур Пахайл уссил кIивагу душ – Маржанат ва Лариса, цивппа захIматну къашавай хьуну, азарханалийн багьну, цанма ххирасса буттарссил бивкIулулсса бан къавхьуну. Цибанссар, укунсса кьинирду дуркlун дур.
Пахай лавмартсса азаруннил жуятува личIи баврил жижара буллай, кьурчIишиву кIидачIлай буру ванил уссил ва ссил оьрчIащал, душвавращал, ссурахъавращал, махъсса гъан-маччаминнащал ва дустуращал.
Махъминнал оьрмурдай барачат бишиннав, Пахайл бунагьирттал аьпа баннав, ва дакIнийнува битаннав.
Ккуллал жямат, дустал
Байссунгъурдул арс Абакаров Аьвдулмажид
Вай гьантрай, 72 шинал оьрмулуву, къашавай лахъигу къалавгун, жуятува батIул хьунни ДГУ-лул аналитикалул ва фармацевтикалул химиялул кафедралул лабораториярттал хъунама Абакаров Аьвдулмажид Байссунгъурдул арс.
Аьвдулмажид увну ур 1948 шинал Хъусращиял шяраву. 1966 шинал хьхьичIунну Хъусращиял дянивмур даражалул школагу къуртал бувну, дуклан увххун ур Дагъусттаннал паччахIлугърал университетрал химиялул факультетрайн. 1971-1973-ку шиннардий къуллугъ бувну бур Совет аьралуннаву, Арманинал ва Туркнал дазуй хIаписарну.
Шамилчинмур курсирай дуклай унува, зий уссия Баргълагавал Каспийскаллал бассейннал инспекторну. Университет къуртал бувну махъ, 1973-1978-ку шиннардий цIакь увну уссия ва управлениялул хъунама инспекторну. 1978 шиная шинай, аьпалухьхьун гьаннин, зий уссия ДГУ-лул химиялул факультетрай. А. Абакаровлул чялишсса пишакаршиврул даврил кабакьу байва химиялул факультетрал элмулул, дуккаврил ва методикалул даву хьхьичIунсса даражалий сакин дан. Дуссар ахттаршиннардансса шанна свидетельство.
Аьвдулмажид Байссунгъуровичлул бивтссар кутIасса, амма щаллусса, яргсса оьрму. Инсантуран ва дакIний личlантIиссар аькьлу бусса, аьчухсса, захIмат ххирасса, лагма-ялттуцириннан кумаг бан мудан хIадурсса инсаншиврий.
Лавгунни жуятува хъинсса, дакI тIайласса инсан, ххаллилсса кулпатрал заллу, лагма-ялттуцириннал хIурмат бушиврул, ссавурданий ялапар шаврил ва зузаврил эбратран ишин лайкьсса чув.
Дуссар «Аьзизсса инсан къаивчIайссар, му жучIатувар лагайсса» тIисса калима. ЛичIувча Аьвдулмажидлул оьрмулухсса ччаву щала кулпатрал ялтту лирчуну, миннал оьрмурду чанна буллай, цува ялату лагаврил видачIрашиву, дард ва къумашиву рахIат дуллай. Ванал кулпатрансса, чIирисса духьурчагу, рахIатшивуну хьунтIиссар цала бусса оьрму ччаврил вибувцIуну, чIявучин эбратран лайкьну бутаву. ЧIявусса бакъассар укун, цаннан ца бувчIлай, нахIу-хIалимну оьрму бувтсса кулпатру.
Жул дакIурдиву Аьвдулмажид личIантIиссар дакI хъинсса, караматсса, лагма-ялттуцириннайх ххаришивуртту дачIайсса инсан хIисаврай.
ДакIнихтуну хъуннасса кьурчIишиву кIидачIлай, жижара буллай буру Аьвдулмажидлул кулпатрахь, арсурваврахь, цинявппагу гъан-маччацириннахь.
Хъусращиял жяматрал цIания АьвдурахIман Адамов
Гьарица чулуха итххявхсса бия
Хар-хавар бакъа жула ялун бивсса кIул бакъа балаллул махIрум бунну жува язиминная, ххираминная, ххуйминная. Къадурккунни ва лавмартсса коронавирусрал азар Кабиевхъал кулпатрал чIарахгу.
Андриана Аьбдуллаева
Мудангу чIюлуну, цIу-цIампир буну лавхсса, дирисса, бюхъу-хъит ва гьавас бусса ПатIимат ХIасановна цила оьрмулул шиннаяр жагьилну чIалан бикIайва. Цуппагу цIу бусса, бавцIусса кIану чIюлу буллалисса хъамитайпа бия. Бия гьарнан кумаг бан, чIарав бацIан ччисса, гьарнащал маз лякъин кIулсса инсан. Ххирая ва студентътурангу, архIал зузиминнангу, чIахху-чIарахнангу. БикIай инсантал тачIаввагу ва дунияллия къагьан кунма чIалачIисса. Мукунсса бия вагу.
ПатIимат бия лакралгу, оьрус миллатралгу ххуй-ххуйми хасиятру ларсъсса душ. Ванил нину-ппу, дяъвилул участниктал, Гъумучатусса ХIасан ХIасанов ва Волгоградуллал областьраясса Таисия Степановна кIул хьуну бур дяъвилул цIараву, Сталинградуллал цIанийсса къизгъинсса талатавуртту нанисса чIумал. Дяъви къуртал хьуну махъ бувсса вайннал ташулия бивзун бур 4 душ. Миннавасса ца бия ПатIиматгу. КIива миллатрал оь хIала бувхсса буну тIийяв, итххявхсса, гьарица чулуха гьунар бусса бия цуппагу.
Дагъусттаннал медициналул училище къуртал бувну махъ, кIира шинай шагьрулул оьрчIал поликлиникалийгу зий бивкIун, ПатIимат бувххун бур Дагъусттаннал университетрал биологиялул факультетрайн. Вагу ххуйсса кьиматирттай къуртал бувну, мадарасса шиннардий зий бивкIун бур МахIачкъалаллал 5-мур школалий. Мунияр махъ ванил къуртал бувну бур психологтал шайсса кlира шинайсса курсру. Зун бивкIун бур Дагъусттаннал педагогический институтраву, цал тарихрал, яла психологиялул факультетрай ассистентну, хъунмур преподавательну, кафедралул доцентну. 2014-ку шинал Москавуллал педагогический университетраву магистратурагу бувккуну, «Психологиялул магистр» тIисса цIа ларсун дур. Сайки 30 шин хьуну дур ванил студентътурахь дарс дихьлай.
ПатIимат ХIасановна бия ДР-лул лайкь хьусса учитель, захIматрал ветеран. Ванил лавайсса даражалий сакин дайва элмийсса конференцияртту, симпозиумру, ккуркки столлу. Ххирану, тIалавну бия даврийгу, ичIувагу. Ванин кIула инсаннал чIарав бацIан, дакI данмур бусан. Бия аьчухсса, хIал бавкьусса.
— Ва ттун, ласнал нину бакъаяча, га яла аякьа думур нинугу, вихшала дишин бучIисса дусгу, чул бищай кIанугуя. Жул оьрчIан бакъа чара бакъасса аму-дадая. Чани ва гъилишиву нанисса инсан бия. Жун ванищал рахIатшиву дикIайва. Ялату магъи ларсъсса кунма ливчIунну, — тIий бур ПатIиматлул арснал щар Эльвира.
ПатIимат аьпалул шаврил кьурчIишиву кIидачIлай, жижара буллай буру ласнахь Манаплухь, арснахь ХIасаннухь ва ванал кулпатрахь, уссурссуннахь.
Имандалий лавгун лякъиннав. Алжаннул ххари баннав.
Шамиллул арс Кьадилаев Паша
Май зурул 17-нний лавгунни дунияллия 1-мур ЦIувкIратусса захIматрал ветеран, Шамиллул арс Кьадилаев Паша.
Увссар 1936 шинал ЦIувкIрав, шагьрулийн изаннин шяраву колхозрал давурттай зий уссия, 1977 шинал МахIачкъалаливн ивзун, Сепараторный заводрай зий уссия пенсиялийн укканнин. ЗахIмат ххирасса, дакI — аьмал хъинсса, халкьуннащал хIал бавкьусса адамина уссия. Мудангу шяраваллил жяматрал, чIахху- чIарахнал чIарав ацIайссия. Ванал бивкIулул кьурчIишиву кIидачIлай жижара буллай буру кулпатрахь Уммугьанихь, арсурваврахь, душваврахь, куявтурахь, уссихь Сиражуттиннухь ва цинявгу гъан- маччацириннахь. Ялавай бищлай буру душваврал ванаха бувсса ххаругу.
Буттай, бусравссия
Ина бивт ххуллу,
Щалвагу наслулун
Эбратсса оьрму.
Къатлун хъинсса заллу,
Ххуйсса лас ва ппу,
Пиш тIийнасса инсан,
ХIакьсса зунтталчу.
Ина бувсса захIмат,
Хъама битайхрав,
Вил цIа марцIну ядан,
ХIарачат банну.
1-мур ЦIувкIуллал жямат
