«Алжаннул ккурккай Ккурккул» тIисса Аьвдуссалан Магьдиевлул лу хас бувну бур цала буттал шяраваллин, мунил жяматран. Му лу буссар цIана сайки гьарица ккуркличуначIа, бакIрал чагъар кунма, ябуллай.
Цала тайпа-тухумраясса хьхьичIвасса инсантал дакIнийн багьувкун, ккурккул буссар ва лу ххилтIу буллай, минная ци чивчуну бурив ххал буллай, цанма хъамабивтсса цала инсантал луттирал кумаграйну кIул буллай.
Луттираву бур аьлтту бувну тарихирал шачIанттай Ккурккуллал шяравалу цукун сакин хьуссарив, хъун-чIири хьун ци савав хьуссарив. ЧIалай бур лу сакин бавриву бивхьусса хъунмасса захIмат. Ккурккуллал цIа дургьуну чивчусса луттираву бур цайми щархъал гайра шиннардийсса багьу-бизулул бутIагу чIалай. Ттисса заманнай Ккуркливгу чIявусса бур цала шяраваллил тарих, багьу-бизу къакIулсса. Цала-цала гъан-маччамигума къакIулсса бур.
Аьнтну чивчуну бур Агълар-ханнал заманалия, Ккурккуллал чулухуннайсса мунал къулагъасрая, мунайн мютIи хьун къаччисса Ккурккуллал жяматрая.
Чивчуну бур ца бивкIссарив тIаннул усттартал, чарил усттартал, къалайчитал, уссал усттартал, учительтал, шаэртал, аьлимтал, дарзитал – хIасил, цинявппагу пишакартал.
Хъуннасса къулагъас дуллай ур Аьвдуссалан Хъунмасса Буттал кIанттул цIанийсса дяъвилий гьуртту хьуминнах. ЧIявуссаннан кIулну бакъар цума чув талай ивкIссарив, цуку-цукунсса къучагъшивуртту дурссарив, цукун ци ххуллий жан дуллуссарив.
Луттираву кIицI лавгун ур чIявуминнан хъамаивтсса ТагьманхIажи, ванал гьан дурсса арцух бувну бур га чIумалнин къабивкIсса мизит, Хъунабуттахъал къатри, щаллу бувну бур цаймигу мурадру.
Оьлуркъусса кьулчинмур ттуршукулул шиннардил дайдихьулий Ккурккуллал арсурваврал бакIрачIан бувкIмур ва луттираву бакъа вакссава аьщуйн щуну чувчIав чивчуну бушиву къакIулли. Шикку бур чивчуну граждан дяъвилий гьуртту хьуминнаягу, Урдиланнуя, Эсал МахIаммадая тIайла хьуну, Уммухъал ХIанзатлуйн бияннин. Луттирай бакIра-бакIрах кIицI лавгун бур хьхьичIавасса Ккурккуллал шаэртал: ЧукIундалав, МахIмуди, Зайду, Щаза. Ттун гукунсса буттал шяраваллихасса лу чувчIаввагу къаккавкссар. Ва бур буттахъал аьдатру, багьу-бизу, ласу-къасу, кIану, тIабиаьт чивчусса лу.
ЧIалай ур Аьвдуссалан буруккинттарай ушиву буттахъал шяраваллил тIабиаьт даххана хъанахъаврия. Га ур тIабиаьтращал ихтилатрай куна: шиву мюрщи нехру, жу кIюла дурксса цанни, тIайла дара, чун-дунугу дяйкьуну кьакьаннин, хъуниминнучIан тIий. Мюрщи щаращив – кьакьан хIадурсса, чIарав бацIияра, буруччияра тIий. Хъуни щаращив – жартирал гъира гьаннин буругияра жух тIий (гъаттарая, чарттая, муххардия буруччияра тIий). Урттил лухччив чIумуй марцI дувара тIий, хъуру курчIу хьун мадитару тIий. Нехру дяйкьин мадитару.
Тарихирал чартту, кьунтту – жу ябувара тIий. Багъру – жул пахру-ххара буруччара, лиян мабару, уртту-тIутIал кавсру – жул тирхханну чIири личIан мадару тIий ур луттирал автор. Гьавагума бур цуппа марцIун битияра тIий. Шиву дур аьтIисса, оьвтIисса, кIункIу тIисса тIабиаьт, дур марцIну ядара тIисса ратIру, жу аьпалун битияра тIисса ххюлубакIуртту. ОьвтIий бур кьадру бунайн буттахъал бивхьусса, ттеркьукьи кунмасса, жегъир ххуллурду. Ванищала архIал Аьвдуссалан акъар Ккурккуллал халкьуннал дянивсса иширттава хъинмур хъунма бувну, оьккимур чIиви буллай. ЧIалачIи буллай ур бумур бусса куццуй. Щала лу чивчуну бур шайссаксса гуж бивхьуну, гьари затирал мархха ккаккан бан хIарачатрай ва мурадрай.
Аьвдуссаланнул оьрму лавгунни ца 50 шинуксса хIаллай тархрал дарсру дихьлай. ЦIанагу ур Аьвдуссалан гъан-маччаминнал, чIахху-чIарахнал дянив тарихирал дарсру дихьлай. Хъинсса кумагчину хьунни ванан цала лугу. Утти вагу бур хъиннура куртIсса тарихрал дарсру дихьлай.
Ккурккуллал жямат бур хъунмасса барчаллагь тIий Аьвдуссаланнуйн.
Ханича Аьлиева,
ш. Ккурккул
