Коронавирусрал азар гьулусансса ва ппурттуву даврийн къабуклай шаппа-шаппа щябикIан къашайминнавух бур Сепараторный посёлокрайсса бугьараминнансса ва мушакъатминнансса «Ветеран» интернатрай

зузими (ГБУ РД «Дом-интернат для престарелых и инвалидов «Ветеран»).

Сайки гьарца ссятрай тIиссакссагу, медициналул кумаг аьркинсса, хьхьугу-кьинигу къулагъас аьркинсса, ялгъуз-гъаривсса инсантурал къайгъурдал­сса буллалими. Бугьараминнал ва мушакъатминнал ва миннал­сса буллалиминнал иш-тагьар цукунсса дурив цIуххин на оьвчав му интернатрай кьунияхъайсса шиннардий хъунмур медсестрану зузи­сса, 1-мур ЦIувкIратусса Асият Дукиевайн.

---

ПатIимат Рамазанова
— Март зурул 17-нния тинмай жу цIакьсса карантиндалул кьяйдалий зий буру, санитар-эпидемиологиялул режимрайн бувну, гьарца кьини чара бакъа интернатрал жанахIрая тIайла хьуну, циняв къатрал ва кабинетирттал дезинфекция дувайссар. Хъинну ялув бавцIуну буссару, дезинфекция дувай­сса растворду, бактерицид лампарду, шюшу-кьюшу дуван аьркинмур чан хьун къаритайссар. Гьай-гьай, персонал жяматий­сса транспортрай гьарца кьини даврийн занай буссар, мунияту жу гьарма бюхъайссару вирусра­хьхьун ириянгу. Гьантлун кIийлва, даврийн буххайни хьулухва, маркIачIанмай, персоналгу ххал бувайссар температура дуссавагу акъарив.

Аьмну жучIа ур хIакьину 67 инсан, миннавугу 35 – шанийн агьсса, захIматсса диагнозру ду­сса. Дугума кIира-шанна азар хIала дурхсса. Сайки миннал цинявннал дуссар ХОБЛ (хроническая обструктивная болезнь легких учару). КутIану бусан, ва лахъи ларгсса ва чаран бакъа­сса гьутрурдал азарди. Бувагу вирусрая гъалгъа къатIурчагу, ва азаргу къаххуйсса азарди. Бурувччуну бакъахьурча, ванилгур рахIму къабайсса.

Шанийн багьсса, сукку-кьютIу бакъасса инсантурал гьутрурдавун укуннагу щин дагьлагьиссар, мунияту жул зузалт буссар мукунми къашайшалт зана битлай, кIура баен буллай, цава ца чулий лахъи лаган къабитлай. ЧIявуминнан бувчIлай бакъар цивппа гьавалийн, кьатIув циван буккан къабуллалиссарив ва жу мудан маскардаву циван занай буссарив. Жу хьхьичIва, сайки гьарца нюжмардий тIиссакссагу, культуралул мероприятиярду дувайссия, цума-унугу увсса кьини тортру лавсун, чяй хIачIлай, барча уллалисса махъру лахълай хъин итай­ссия. Артистурайнгу оьвчай­ссия, цивппа артисталгу бучIайва ччя-ччяни. ЦIанакул цучIав къаитаакьайссар, хьхьичIва кунма бухху-букку бакъашивриягу къуману бур вай. Мяйжанссар, телевизор ххал бувайссар, цIусса хавардахгу вичIидишайссар, амма чIявуминнан цичIав бувчIлай бакъар хъанахъимуния, пандемиялия.

ТIайлар, бучIай, ахъул­сса, нацIу-кьацIу ларсун, вай ххари буван ччиссагу. ХIукуматрал дузалшиндарал хIакъиравурив, къулагъас дакъа бакъару. Аьркинмур дур. Дур, гьай- гьай, цинна хасъсса захIматшивуртту. БуллантIиссару миннулссагу. Дузал бан къашай­сса масъалартту бакъар. ЖучIава зузи­сса гьарцагу инсан яла ххуйми мукъурттин лайкьссар учинна сивсуну. Буниялттунгу, бавкьуну, нахIуну ва яла-яла давриву дакI дирхьуну зузисса коллектив бур. Цамур куццуй жучIа зунгу къашайссар, лахъигу къалагай­ссар.

Жул директор Мирзаев Мажид бюхъу-хIарачат бусса, цувагу жаваблушинна дусса, жуятугу тIалавшинна дуну зузи­сса каялувчи ушавривугур иш, гьай-гьай. Гьарцагу жучIавасса инсаннал дакIнивун бухханну, гьарманан цува учIину ушиву асар хьунну зун хIарачатрай буру. Гьарманал оьрмур яла хъунмур ххазина.
Ялун ххигу бан. Асият Дукиева ттул шяравудушри, ца классраву дуклайгу буссия. Ччя-ччяни хьунабакьару, кка­ккару, жун кIулссар чIявуми ванил къари-къужри, хIатта дунияллия лавгмигума. КIулссар цума ци гьунарданул ва ци хасиятрал заллу уссарив.

Циван чирча, Асиятлул хаварду бикIайсса чIявуну цачIавасса къари-къуж­раяр. Ца-цал жу ванийн дяъвангуру бикIайсса, вилва къари-къужраха дуниял хъама риртнува бикIаннав, цайми хавардугу буси тIий. Ваних вичIидирхьукуннив буниялттунгу бувчIлан бикIай, цукун дакI ххуйсса, чумартсса инсантал бикIан аьркинссарив ялгъузсса, инжитсса инсантурал къайгъурдал гьиву хIура къадурну ва кIу къадирзун зузими ва яхъа­нахъими. Учарухха, цIуцIи шанийн къабагьаннав, багьувкуннив, цIимилул чувначIан багьаннав куну. Жул Асият ва ванищал архIал зузими, багьай ххуллий укунминначIан багьаннав куну, щукру буванми бур.