[dropcap]А[/dropcap]ркаллаев МахIаммадрасул Гьимматлул арс увну ур I9I9 шинал КIубурдал шяраву. ОьрчIшиву ларгун дур Турк­нал дазуйсса Гуржиял шяраву. Турк мазрай I936 шинал ванал къуртал бувну бур педтехникум,

яла Ттуплисуллал пединститут­рал тарихрал факультет.

Биялсса мазругу кIулну бивкIун бур МахIаммадрасуллун , ца тарихрал кIулшивуртту дакъасса жагь медициналувасса, жагьгу цайми-цайми кIулшивурттая суал булурчан, тIайлану жаваб дулун бюхъайсса даражалийсса кIулшивуртту диркIун дур жагьилнал.
Оьрмулул 2I шинаву лавгун ур М. Гь. Аркаллаев совет аьралуннаву къуллугъ буллан. Хъунма хIал къалавгун къуллугъ буллай уна байбивхьуну бур дяъви. МахIаммадрасуллунгу нясивну бивкIун бур Буттал кIану душманная мурахас буван цащаласса аьралуннащал. Крымнаву, Украиннаву, Белоруссиянаву ва цаймигу кIанттурдай диялсса аьрщи ххассал дурну дур. Аьщуйн щуну гьарца кIанттурдал цIарду къачичирчангу бувчIлай бур цуксса захIматсса бивкIссарив дяъвилул ххуллу. Ванайн дирну дур кIилла щаву, хьуну дур шамилла контузия.

[dropcap]М[/dropcap]ахIаммадрасуллул хъазамрая парпар тIий диркIун дур диялсса орден-медаллу цивгу биялсса захIмат бишаврихлу лайкь дурсса. Цинярдагу ацIния мяйра награда. Занагу хьуну ур Аркаллаев I945 шинал Лаккуйн КIубурдал шяравун. Кулпатралгу хьуну, захIмат буллан ивкIун ур школданул директорну, колхозрал председательну, партиялул профсоюзирттал давурттай. Ца КIубурдал шяраву акъассагу, ва зий ивкIун ур директорну , тарихрал учительну Ххутрал, Ххюлуссуннал , Уриннал шяраваллаву. Диялсса шиннардий ивкIун ур КIубурдал школданул директоршиву дуллай.

Чув, ци шяраву зурчангу МахIаммадрасул цал цаятура, яла чIаравная тIалавшинна хъуннасса каялувчи ивкIун ур. ХIакьинусса кьинигу ххуйсса зума-мукъуйну дакIнийн утай ва кIулну ивкIнал, хIала-гьурттуну ивкIнал. Ва ия цайми кулпатирттан эбратран ишинсса хIакьсса зунтталчугу, Буттал кIанттуй аьтIисса, дакI цIуцIисса ветерангу.
Бивщуну бур та чIумалсса хIукуматрал хъуниминнал ванал бигьа бакъасса захIматран лайкьсса кьиматгу, дуллуну дур бахшишру, ХIурматрал лишанну ва медаллу.
ХIакьинусса кьинигу бусраврай ядуллай бур ванал наградарду ваная бивзминнал, хъирив нанисса никирттахьгу хъунмяммая, ттаттая буслай.
Алжаннул ххари уваннав ина хIакьсса ветеран!

ХIадур бувссар
Загьрани Аьбдуллаевал

---

Буттаха
Цал ттигу дуккан дав вил шакил, мяммай,
УрчIулчинмур майрал байран гъан хъанай,
Бура дакIнийн бутлай дяъвилул тарих
Инагу хъар лахълай бувцири захIмат.

Чулу хьу къювурдал дакI цIуцIи дуллай,
Дяъвилул хаварду оьрчIахь аьч буллай,
Биялсса бусайва дакI дачIра дуван
Хъарайх кагу дуртун ххирагу буллай.

ДакIнин хъамабивтмур цIуххин гьуз чара,
Акъассархха куну, махъунмай шара,
Суратрайх ках куну ххирагу дурну,
ЧIаврдайх ккур увкусса макьгу лишара.

«Ватан ядувара , цIа бюхттул дара,
Биялсса вирттаврал оьттуй шюршусса»,
Вай бия вил махъру оьрчIахь лергъ тIисса
ТIалавшингу дия цал виярасса.

Зунттал чувнал гьайбат , тIивтIу ненттабакI,
Медаллал кIу бувсса уттасса хъазам,
Жухь насихIат буслай, мудан итталу
Щугълурдаву сагъну уссара, мяммай.

ХIукумат гьаз дуллай зу бивхьу захIмат
Зиялий лавгссарвав паччахIтурачIа,
Мяъданну, хан хъусру цалалуш дуллай
Буччавай бакъархха хъус-ххазинардал.
МахIаммадрасуллул душ Саида