[dropcap]В[/dropcap]ай гьантрай цIуминалийсса ЦIуссалакрал райондалийсса Гьамиящиял шяраваллил бакIчи ХIабибуллагь Рашидов хьунаавкьунни оьрмулул бугьара хьусса захIматрал ветерантуращал.

Имара Саидова
Гьамиящиял шяравасса Кьурбан Муртазялиевлул оьр­мулул 90 шинал юбилейгу барча дурну, дуллунни ванан «Дунияллул халкьуннал дянивсса бандформированиялул кьюкьри ххит дуккан дурну 20 шин шаву» тIисса юбилейрал медаль.
Валижуллагьлул арс Муртазялиев Кьурбан бусса оьр­мулий зий-захIмат буллай ив­кIун ур Гьамиящиял совхозрай. Тамансса шиннардий ва зий ивкIун ур Гьамиящиял совхозрал бригадирну. Тай шиннардий ванал хIарачатрайну совхозрал хьхьичIунсса кка­ккияртту чIалачIи дурссар. Вайннал совхозрал цIа мудангу хьхьичIунсса совхозирттал сияхIрай диркIссар.

— ХIурмат бусса Кьурбан. Ина, вила оьрмулул шиннардих къаурувгун, дакIнийхтуну захIмат буллай ивкIсса инсан ура. Ина лайкьну бивтссар ялун нанисса никиран эбратрансса захIматрал ва насихIатрал ххуллу. Вихьхьун Заннал дуллунни 90 шинал юбилей вила наслулущал хьунадакьинсса каши. Мяйжансса иш бур хъинбала-хъиншивуртту дуллалисса инсантурал оьрмурдайгу барачат бишайсса бушиву. ЧIа тIий ура вин цIакьсса цIуллушиву, талихI, махъминнал ххира-ххуй уллайнасса оьрму, — увкунни ХIабибуллагь Рашидовлул.