Ассаламу аьлайкум, ххира­сса буккулт! ХIакьину ттун зухь бусан ччива жула группалувусса ца ттигу ххаллилсса лакку душния.

 

УзбакIнал шагьрулий Бухаралий хъунма хьу­сса, хIакьину цила кулпатращал Москавлив ялапар хъанахъисса чIяйридуш ПатIимат МухIуттиновая. «Лакку билаятрал рухI» группа тIивтIусса гьантрайва оьрус мазрайгу, ла­кку мазрайгу усттарну буллали­сса ихтилат­райну, интеллектрайну, мяърипатрайну ПатIимат ттул дакIнил лавсуна. На ва учитель бухьунссар тIий буссияв. Ялагу, ттун тIааьнну бикIайва ПатIиматлун «Илчи» кказитрай бивщумуния хавар бушиву. Цахъи махъ ттун кIул хьунни ва ЧIяйннал шяраву бусрав­сса агьлу-авладрал душ бушиву, дяъвилул участник АбутIалиб Рамазановлул ва цIанихсса учитель Асват Каримовнал душнил душ бушиву. Вай гьарзад кIул хьуну махъ, ттун хъиннува гъира багьуна ванищал хьунабакьин. Москавлия ца-кIива гьантлий­сса бувкIун, мажал бакъа бунугу, ПатIиматлул редакциялийн бучIансса чIун ляркъунни.

ЦIунилгу мукIру хьура инсаннал мяърипатгу, тIул-тIабиаьтгу, бюхъу-бажаргу мархрая нани­сса бикIайшиврий. АбутIалиблул ва Асватлул хъуни бувну бур 7 оьрчI-душ. Вайнная бивзун бур 24 оьрчIал оьрчI. ПатIимат бур АбутIалиблул ва Асватлул хъунмур душнил Татьянал (аьпа баннав) душ.

ПатIиматлул бувсунни цила ниттин Татьяна тIисса цIа циван дирзун диркIссаривгу. Ванил тта­ттал АбутIалиблул дяъвилул ххуллу байбивхьуну бур Баргълагавал Украиннай лейтенантнал чиндалуву. Винница шагьрулучIа ванайн кIусса щаву дирну дур. Ва рязину ивкIун ур госпитальданий цала лавай бавцIусса медсестра Татьяная ва нудру бувну бур дяъвилия сагъну зана хьурча ва цанма душ барча Татьянал цIа дизан. Мукун дирзсса цIа дур ПатIиматлул ниттил цIа.
Ппу Шяпи увну ур УзбакI­наву, Бухара шагьрулий. Шяпинал нину-ппу Сулайман (Шяпи-Сулла) ва Лайли хъу­­с-кьинилул заллухъру бивкIун бур, 1936-1937-ку шиннардий, кулактураща гьарзат зехлахисса чIумал, вайннал, шярава бивзун, Дянивмур Азиянаву мина дурну дур.
— Лайлин цумур шагьрулий­сса щин тIааьн дизайрив ккар­ккун, микку ликказан данна, — куну, Сулайманнул Бухара шагьрулий мина дурну дур.
— Бухара – караматсса шагьру буссар. Шикку буссар эмаратсса Багьауттин Накшбандил мавзолей. Маккалив гьан къабюхъайминнал чIивисса хIаж байсса рувхIанийсса кIанттур ва, — буслай бур ПатIимат.

Ва цуппагу бувну бур ва хъунма хьуну бур Бухаралий. Так 11-мур класс къуртал бувну бур, бава-ттаттачIан бувкIун, ЧIяйннал школалий. Школа къуртал бувну махъ ПатIимат бувххун бур Бухардал дуки-хIачIиялул ва куклу промышленностьрал технологиялул институтравун. Ва къуртал байхту най буна зун бивкIун бур Бухардал «Водоканал» идаралул химиялул ва биологиялул хъунмур лабораториялий цал инженер-радиологну, яла хIакин-бактериологну. «Водоканалданул» директорнал хъиривчуну зий ивкIун ур ванил ппу сайки 35 шинай. Миккура планово-экономический отделданий зий диркIун дур нинугу. Махъсса шиннардий ва отделданул каялувчину диркIун дур. Коллективраву вайннал хIурмат хъунмасса бивкIун бур.

ПатIимат зузисса лабораториялий агьалинал къатравун нанисса щин ххал дайсса, миннул анализ дайсса диркIун дур. Тикку цивппа щинал марцIшиврул ялув бавцIуну бивкIсса куц дакI­нийн бутлай, ПатIимат бур Дагъусттаннал водоканалданух ца ябитан ччива тIий.
Оьрмулул 24 шинаву щар хьуну, бивзун бур ва Дагъусттаннайн. Щар хьуну бур цила шяравучунан Давудлун.

Цаппара шиннардива вайннал кулпат Москавлив бивзун бур. Давуд УФСИН-лул спецназраву къуллугъ буллай ур. Ва ур подполковник. Вайннал кIия арс ур. Хъунама, 19 шин хьу­сса Ибрагьин, спортрахун агьсса жагьил ур. Ва, кIилчинмур классрава айивхьуну, самболул ва дзюдорал секциярдайн занай ур, 5-мур классраву тренертурал увцуну ур итххявхсса оьрчI цIанихсса «Самбо-70» школалийн. Ибрагьиннул Москавлив ва Москавуллал областьрай хьу­сса личIи-личIисса чемпионатирттай хьхьичIунсса кIанттурду бувгьуну бур. ЦIана ва дуклай ур Мос­кавуллал педагогический институтрал физкультуралул факультетрай. ЧIивима, 16 шинавусса Сажид, дуклай ур Мос­кавуллал медициналул колледжраву. Сажид ур творчествалул гьунар бусса оьрчI. Ва занай ур «Ты+я» тIисса Москавуллал театрданул студиялийн. КъавтIаврил, назму пасихIну ду­ккаврил гьунар бур. Роллу дугьай личIи-личIисса постановкарттаву. Вагу «ЧIяйридуш» ансамбль сакин бувну бивкIсса, цуппагу авурну къавтIун бизай­сса Асват-бавая бивсса гьунар бухьунссар.

Вайннал кулпатраву ца-ца гьунар бакъасса цучIав акъар. ПатIиматлул цилагу ххуйну сурат дишай. Школалий дуклаки­сса чIумал цила дирхьусса ссутнил тIабиаьтрал суратру Германнаву­сса конкурсрайн гьан дурну, ванил 2-сса кIану бувгьуну бивкIун бур. Школалийгу ПатIимат ххуй­сса кьиматирттай дуклай бивкIун бур. Ттаттал АбутIалиблул кунма шеърирдугу чичай. Так ми оьрус мазрайсса бур, хIатта ПатIиматлун ххуйну лакку маз кIулну бунугу. Ттун чIявуну хIисав шай, гъурбатрайсса лакрал цала мазрахсса мякь ххишаласса бикIай, ватандалий ялапар хъанахъиминнаяр ххуйну кIулнугу бикIай.
-Царагу шин лях гьан къариртун, нину мудан, мюрщисса жугу бувцуну, шяравун дучIайссия. Бу­тталгу гьан битайва.

Мажал шайхту, нагу Дагъусттаннайн, буттал шяравун биян хIарачат бара. Чув бухьурчагу, лакку мазрайсса жуав баярча, ттул дакI тирх учай. Ттул итталу га инсан хъинну ххуйну чIалан икIай лаккучу уну тIий. Рязину бикIара ттунма УзбакIнаву, Москавлив, Ккавкказнаву ялапар хъанан кьисмат хьуну тIий. Гьарица кIанттул халкьунная ттун чIявусса затру кIул хьунни, лавхьхьунни. Ттул оьрмулул ххуллу авадан хьунни, ярг хьунни, — тIий бур ПатIимат.
Му мукун бушиву тасттикь буллай бур ванил узданшиврул, тIул-тIабиаьтрал ва мяърипатрал.

Андриана Аьбдуллаева