Дагъусттаннай Совет хIукуматрал дайдихьулул заманнай Сов­наркомну ивкIсса Жалалуттин Къурхъмасовлул арснал арс Анатолий ттул уссил, аьпа биву, Нажмуттиннул цIакьсса дус ия.

Жу яхъанайгу ца хIаятраву, хъуншагьрулул майдандалучIасса чичулт­рал къатраву, бивкIру. Анатолий хъинну куртIсса, захIмат ххирасса оьрчI икIайва, аьнтсса, кьянкьасса хасиятрал заллу. Га цала хIарачатрайну хъунисса къуллугъирттайнгу лавхъуна.

---

[dropcap]П[/dropcap]енсиялийн увккун махъ, га цала машгьурсса тта­ттал трагедийсса оьрмулулгу, тай шиннардийсса Дагъусттаннал тарихралгу хъирив лаллан ивкIуна.
Лях-карах ганал ттуйнгу оьвчай, агарда цанма ци бунугу та чIумалсса лакрахун багьайсса документ бакIрайн багьарча.

[dropcap]В[/dropcap]ана ва ппурттухгу бувкIунни ганая Гъази-Гъумук Дагъусттаннай цалчин, Ж. Къурхъмасовлул сипталийну, дурсса Шяраваллил хозяйствалул ярмукIалиясса текст. Жула буккултрангу ччан­ссар тIиссара ва хаварданух вичIи дишин.

Хъун дакъасса макьала дур. Амма ванил мяънарду тIурча, чанссагу, ялттурассагу дакъар. Бур шикку, гьай-гьайкьай, аьл­тта хIисав хъанахъисса, къуллугъчитурал цала дуллалисса даврил кьимат ххи бансса политикийсса пафосгу, цIусса оьр­му байбихьлахьисса инсантурал ххаришивугу, ялун нанисса кьинилийн умуд бишин буллай, халкь ххари бансса хIарачатгу.

Дагъусттаннай цалчин дуллалисса ярмукIа Гъази- Гъумучату дайдишавугу хIазрансса дакъахьунссия тIиссара. Ванин савав – Къурхъмасовлул тани ххишала бакъа машгьурсса, хьхьичIунсса пикрирдал заллухърусса лакращал – Саэд Габиев, Гьарун Саэдов, Ирбагьин-Халил Кьурбанаьлиевлущалсса ва цайминнащалсса дусшиву, кIулшиву духьунссия.

[dropcap]В[/dropcap]а ялагу, аьлимчу, чичу А. ХIусайнаевлул къачирчагу, танисса Гъази-Гъумучиял базарданул сий, Дагъусттаннай дакъа­ссагу, хIатта Аьрасатнал Нижний Новгородрал ярмукIалул даражалийсса диркIун дур. Ши­ккува дакIнийн бичин бучIир машгьурсса художник Мусаясуллул, Гъази- Гъумучиял базардания буслай, кIикку дакъасса дакъая, ччан дикIарча, “аьнакIул накIгума” лякъин хьунссия тIисса махъру. Вай гьарзатгу хIисавравун лавсун, на ва текст таржума бав.
Ца зат ялагу. Жува хIакьину, ва ца ламусну кунма, нажа-мажагь бакъа Гъумучияйн Гъази-Гъумучи къаучару. Ши­кку тIурча, кIанийн так Гъази-Гъумучи бакъа тIий бакъар.

[dropcap]В[/dropcap]а материал рирщуну дур 1925-ку шинал “Красный Дагестан” тIисса кказитрай. Авторнал инициаллугу дур И. Б. Амма, макьала чIюлу дан, Гъази-Гъумукун ярмукIалийн най, увххун, гьухъаивтсса Ходаклул хъярчийсса сурат-шаржгума дур.

[dropcap]М[/dropcap]атериал ккалаккийни, бакIравун бухлай бур тани хъинну сийлийсса, замана цIу бу­ккан буллай чялишсса тай инсантурал бакIурдичIан яла махъ ци бувкIнавав тIисса пикригу. Масалдаран, Ж. Къурхъмасов, хIакьсса интеллигент, уздантурал авладраясса, Парижлив Сорбонна университет бувкку­сса, рухIгу, жангу революциялул даврин харж дуллай ивкIсса инсан, цаппара шиннардива хъунмасса къуллугъраягу укьан увну, аьщун изан най бур. Мукунма кьурчIисса кьадарду ялун бивну бур макьалалуву кIицI лавгсса цайминнал бакIурдичIангу. Цалсса тIурча, вай цалла дуллалисса ххуйсса ва агьамсса даврия рязину, дакIру гьавасрал ва ххарисса асардал дурцIуну бур.
Ва макьалалун дирзсса цIагу, циваннив къакIулли, дур лап лахъисса, сайки анонсран ккалли дан бучIисса.

Ж. Къурхъмасовлул Лакрал дязаннив Гъази-Гъумук, Да­гъусттаннал зунттаву, цалчин хъанахъисса, экономикалуву ва политикалуву агьамсса иширан ккаллисса ва вания тихунмай шагьрулул ва шяраваллил дянивсса арарду гъан даврин кумагрансса Шяраваллил хозяйствалул ярмукIа сийлий тIиртIунни
Гъази-Гъумучиял шяраву 11.06.1925-ку шинал, ссят 11-нний, ярмукIа тIитIин хIадур бувсса майданнив аркалул хьхьичI дарцIуну дия пионертурал ва комсомолецтурал дас­ттарду. Оркестрданул музыкалул чIу гюргу тIий бия. Ши­ккунма бавтIун бия ярмукIалийн бувкIсса хIат-хIисав дакъасса хъудугьулт. Вай циняв ссавур дакъа ялугьлай бия. Халкьуннал ихтилатирттал гъавсса чIурду гьар кIанава баллай бия, дазу-зума дакъасса ярмукIалул майдандалул лагрулий.
Вана, архния чIалан бив­кIунни кIива автомобиль. Циняв, микIлавчIсса кунма, пахъ багьунни. Машинартту хIурхIа гъан хьунни аркалучIан. Га цIана гюргу тIисса “Интернационалданул” чIунил барча бунни циняв бавтIцири.

ЯрмукIалийн бувкIминнавух бия: Дагсовпарткомрал председатель гь. Къурхъмасов, Дагкомрал жаваблувсса секретарь гь.Колесов, Предисполкомрал секретарь Жалиев, Окркомрал секретарь гь. Саэдов ва цаймигу. Внутрторграл нарком гь. Ходаклул вай хьунабавкьуна ва циняв гъан хьуна плакатирттал, лозунгирттал, суратирттал ва тту­гъал чIюлу бувсса майданнивсса бюхттулсса трибуналучIан.
Махъру лавхъуна гь. гь. Къурхъмасовлул, Колесовлул, Жалиевлул, Саэдовлул, Билаловлул (сельсоветрал чулуха), Ходаклул, чIаххувсса округир­ттал ва ярмукIалийн бавтIсса хъудугьултрал.

ХIукуматрал вакилтурал цала мукъурттиву кIицI лавгуна Дагъусттаннал тарихраву цалчин хъанахъисса ва зунттавусса ярмукIа цIакьсса бурхIлуну хъанахъишиву шагьрулул ва шяраваллил дянивсса ара цIакь дуллалавриву.
Дурус ссят цанний гь. Къурхъ­­масовлул гьаз бувна хъун­­масса ттугъ. Яла ярмукIа тIир­тIушиврун ккалли хьуна.

[dropcap]М[/dropcap]угьлат бакъа Дагторграл, Дагсоюзрал, Дагсельхозкредитсоюзрал, кIанттул кооперациярттал ва шиккун бавтIсса усттартурал ларекру, палаткартту машачитурал бувцIуна. Дахху-ласу дайдирхьуна.

Цаппарасса пессимистуран, рихшантчитуран ккаккан хъина, Дагторграл ттучаннавун­сса халкьуннал мугьали. Архния урувгнан пикри хьунссия, ай, тикку хъус укра дачIлай духьунссар тIисса. Мяйжаннугу, чит 32-35 кI. МачI – 34 кI., къуркъи качар – 36 кI., ппиринж – 15 кI., ссахIван – 20 кI. ва мукунмасса багьлийсса цайми затругу шяраваллил халкьуннан украссану чIаланссия. Вайра вай ттининнин хъудугьулт­ран шамлий ххирану дацIлайри диркIсса.

Дагторграл багьрачIан гъан хьун хIарачатрай, кIанттул кооперациялунгу цала багьри лагь бан багьуна. Базар багьригу, укунсса данди бацIаврийн, конкуренциялийн къарши бацIан къахъанай, агьамми дахху-ласулул багьри, къачча-къаччайнма, лагь бувна.
Цалчинсса ярмукIалул кка­ккияртту эбратну дацIантIиссар хIукуматрал машлул иширттаву ва кооперациялун, ххуйну дайдирхьусса зунттавусса экономикалул фронтрал ккаккияну ккалли хьунтIиссар.

И. Б.
“Красный Дагестан”
кказитрая. №135 (950) 17. 06. 1925 ш.

P.S. Ялагу къулагъас давияв вава кказитрай 121 номерданий 01. 06.1925-ку шинал дур­сса чичрулух
“Освободить от всех местных налогов и сборов от торговли на открываемых в ДАССР 1925 года ярмарках».

[dropcap]М[/dropcap]ахъва-махъгу учин. Бю­хъайхха кказит ккалаккинал авлад­рай, ттаттахъая, бавахъая бавну, кIа ярмукIалия ци бунугу бавсса, дакIний ливчIсса бикIан. Агарда лякъирча, бавмур жухьвагу бусарча, ччанссия. Вагу жула тарихраву ккалли къабан­сса иш бакъархха.

ХIадур бувссар
Качар ХIусайнаевал