ЦIусса шинал байрандалул хьунийн Республикалул БакIчи Владимир Васильевлул МахIачкъалалиясса 9 шинавусса МахIаммадлул чIа куну бивкIсса хиял дузрайн буккан бунни.

З. АьбдурахIманова
Декабрьданул 26-нний Москавлив хьуссия Щалагуаьрасатнал даражалийсса «Ттущал хияллай букки» тIисса проект­рал лагрулийсса «Хъун Елкалул мурадру» тIисса акция. Акциялул мураднугу бивкIссар, личIи-личIисса регионнаясса оьрчIал щаллу хьуну ччисса мурадру чивчусса карточкарду елкалий лархъун, миннущал регионнал бакIчитал кIул бувну, шайсса куццуй ми байрандалул хьунийн щаллу бансса чаранну лякъин.

Жула республикалия­сса 3 оьрчIал чивчумунищал ва вайннал хияллащал кIул хьуну ур Владимир Васильевгу. Миннавасса цаннал хиял бивкIун бур Москавлив хьунтIисса Хъун Елкалул байрандалий гьуртту хьун, кIилчинманал – Санкт-Петербурглив Планетарий ххал бан ва шамилчинманалгу – лисапIитI хьурдай тIисса.

ДР-лул спортрал министр­нал хъиривчу Зайнал Са­лахIу­ттиновлул бусаврийну, бахшишрансса лисапIитI МахIаммадлучIан вай гьант­рай дирну дур. Ванал нину дакIнихтуну барчаллагьрай дур Республикалул БакIчинайн, укунсса оьрчIал дакIру ххари дансса чIунгу ляркъуну, вайннал хияллугу щаллу бувну тIий. «Къавихну буссияв жу арснал цала хиялданущалсса га ча­гъар чичайни, оьрчIал чивчумуних къулагъас дансса мажал щил шайссар тIий. Шайсса бивкIун бур, ччан бикIарча. Ххариру оьрчIал дакIниймур бартлавгун. Барчаллагь ва акция сакин дурминнангу, ваний гьур­тту хьусса жула Республикалул БакIчинангу», — тIий бур ва.