ХIакьинусса кьини жулла республикалий халкь гриппрал къашавайсса масъала ягин къавхьушиврия, цилла кьаралданий най бушивриясса пресс-конференция хьунни вай гьантрай Дагъусттаннал Журналистътурал союзрай республикалул хъунама клиницист, С. М. МахIаммадовлул цIанийсса лахъай азардал Респуб­ликалул центрданул хъунама хIакин Муртазяли МахIаммадовлул ва вава центрданул отделениялул хъунмур, кафедралул доцент Зарема ТIагьирова гьурттусса.

З. АьбдурахIманова
«Лахъай азардал сияхIрал цалчинмур кIанай цIана дур бявкъу-гъили хьуну халкь къашавай хьусса азарду. ХьхьичIми шиннардих бурувгун, респуб­ликалий дурар ттигу гриппрал эпидемия ппив хьун. Жул центр ва зузалт хIадурну ва аьркинсса дарурттал лащу-щаллуну бу­ссар, агана цIуцIаву ппив хьуну, халкьуннан хасъсса пишакартурал кумаг аьркин хъанарча», — бувсунни Муртазяли Мусалаевичлул. Ванал бусаврийну, халкьуннал ккалли-сан къадурну, къашавай буна кьатIушав буклай, лахъайсса азар-гриппрал шанна вирус дусса дур: А, В ва С. ЖучIара гьарзану хьунадакьаймур А журалул вирус дусса дур.
«ХIакьинусса кьини республикалий гриппрал эпидемия ппив къахьуншиврул хIукуматрал, цIуллу-сагъшиву дуруччаврил, кIулшивуртту дулаврил зузалт­райн, студентътурайн ва дук­лаки оьрчIайн прививкарду дурссар. Гриппрал азар хъинну нигьачIиссар ххюра шин хьун дурасса оьрчIан ва 60-65 шинава ливчусса хъуниминнан. Ва азар оьнийн дагьарча, цалчинма цалчин инсаннал ссихI бигьайми базурдайн гуж багьайссар. ЧIяруну гриппрал азарданул бронхитрал ва пневмониялул азардал гьану бивзун лякъай», — бувсунни хъунама хIакиннал. Ванал, мукунна, чIурчIав дурунни махъ ппурттуву жула халкь лахъай азарду сукку къахьун дувайсса прививкардая махъунмай хъанахъисса масъалалийгу.
«Махъзаманнай СМИ-рдавугу, укунма халкьуннавугу вакцинардал лагма-ялтту ппив бувсса бачIвасса хаварду сававну, укунмагу гьарзатрая вас-ццахлийсса жулва халкь цалла цIуллу-сагъшивручIан баччибакъану гъан хъанай бур. Ва на ялув кIицI лавгсса, хIукуматрал идарарттай зузисса халкьуннайн вакцина бувссар тIисса масъалалучIан кIура баллай, учин ччива, бявкъу-гъили шаврил азарду ппив къашаврил цалчинмур савав вакцина бувми гьарзанубушаву душиву. Агьалинал хъунмур бутIа мюхчан бувну тIий».
Журналистнал, ми вакцинарду ссая бувссарив, щил був­ссарив, цукун, ци шартIирдаву хъиривлаявуртту дурссарив зун кIулссарив тIисса суалданун Муртазяли Мусалаевичлул бувсунни, цумур-цагу вакцина хасъсса элмийсса хъиривлаявурттугу дурну, республика дарурттал дузал дувайсса хIукуматрал организациялул бучIан байшиву хасъсса сертификатирттащал. Ванал ххи бувунни жулла хIукуматрай бувсса вакцинагу цавагу чулуха чил хIукуматрай бувминнуяр махъун къабагьлагьисса бушиву.
«Медициналуву танийгу, цIанагу итабакьлакьисса вакцинарду сававнурхха халкь кьатI байсса лахъайсса оькки азарду дунияллий духлаган дан бювхъусса. Халкьуннаннив му зат бувчIин ччай бакъар. Цал ттигу тикрал буллай ура, прививкарду дан рязи къавхьуну, зувагу, зула оьрчIругу нигьачIавривун мабутларди», — ххи бувунни хIакиннал.
Зумрут ТIагьировал бувсунни, инсаннан цува къашавай хьун чIалай, чурххай хIал бакъа, аьнч-ккинч дирсса чIумал цалчинсса ссятурдий цуку-цукунсса дару-дарманну бан аьркин­ссарив. Вайннуя мадарашиву дакъахьурча, мугьлат бакъа хIакинтурайн буккан аьркиншиву.
«Цаппара шиннардил хьхьичI гриппрал азар сававну нигьачIисса группалувусса къашайшалт ливтIусса ишру хьунабакьайсса бивкIнугу, махъ шиннардий республикалий укунсса ишру хьуну бакъар», — бувсунни ванил.
Пресс-конференциялул ахирданий хIакинтурал республикалул СМИ-рдайхчIин цал ялагу халкьуннахь тавакъю бувунни, прививкардая нигьакъабувсун, цалва цивппагу, цалва кулпатраву бумигу мюхчан баву.