[dropcap]Н[/dropcap]оябрь зурул 20-22-нний Москавлив най бивкIсса цIуллу-сагъшиврул мушакъатшиву дусса оьрчIал дянивсса
захIматрал пишардал усттаршиву ккаккан дуллалисса Миллатирттал V-мур «Абилимпикс» чемпионатрай гьуртту хьусса Дагъусттаннаясса командалувасса оьрчIру зана хьунни хьхьичIунсса хIасиллащал.
Чемпионатрай Дагъусттаннаясса жагьилсса пишакартурал кIира мусил, ца арцул ва кIира чарвитул медаллу ларсшиву бувсунни «Успех» центрданул директор, жула региондалийсса Worldskills Rossia суккушиннарал координатор Шамил МахIаммадовлул.
Ва ххуллухсса бяст-ччаллаву 9 журалул захIматрал пишардал магьиршиву ккаккан давриву гьуртту хьуссия Дагъусттаннаясса оьрчIру.
— Пахрулий кIицI лаган ччай ура, «таржумачи» ва «веб-дизайн» тIисса номинациярттай Дагъусттаннаясса пишакартурал бувгьушиву цалчинсса кIанттурду. Яруннил мушакъатшиву дусса бунагу, Саида ХIажиевал исват бунни ингилис мазрайсса ччимур журалул текстру таржума бан кIулшиву. «Веб-дизайндалулмур» номинациялий шанмагу хьхьичIунсса кIану бувгьунни жулва пишакартурал: мусил медаль ларсунни Ринат Арслановлул, арцулмур медаль – МахIаммад Худатбаговлул ва чарвитул медаль – Булат Булатовлул.
«Психология» тIимур номинациялий чарвитул медаль ларсунни Заират Садруттиновал. Гьашинусса чемпионатрай жула пишакартураща бювхъунни ххаллилсса хIасиллу ккаккан дан. Чемпионатрай гьуртту хъанахъинигу жу дакI дарцIуну бивкIру ххувшавурттащал зана хьуншиврий. Мяйжаннугу вай бигьа бакъасса бяст-ччаллаву вайннаща бювхъунни цалва буллусса махъ бацIан буван, — буслай ур Шамил МахIаммадов.
Ва чемпионат хъанахъиссар «Россия – страна возможностей» проектрал платформалувусса «Образование» тIисса национал проект иширайну дачин даврил лагрулий хъанахъисса ца яла хьхьичIунмур проектну.
Аьрасатнал Президентнал грантирттан лайкь хьуми
ЦIуллу-сагъшиврул ссуссукьусса оьрчIал дянивсса захIматрал пишардал усттаршиву ккаккан дуллалисса Миллатирттал V-мур «Абилимпикс» чемпионатрай ххув хьусса пишакартуран дулун ккаккан дурну дур Аьрасатнал Президентнал грантру.
ХIукуматрал БакIчинал бувсса «О дополнительных мерах государственной поддержки лиц, проявивших выдающиеся способности» тIисса 2015 шинал декабрь зурул 7-нний бувсса №607-мур ва 2019 шинал ноябрь зурул 11-нний бувсса №565-мур хIукмурдайн бувну, республикалул бюджетрава вай пишакартурал кIулшивурттал даража гьаз баву мурадрай гьарица зуруй 20 азарда къуруш дулун ккаккан бувну бур.
ХIадур бувссар
Имара Саидовал
