Ккавкказуллал регионнал культуралул министртуращал
[dropcap]Б[/dropcap]илаятрал культуралул оьрмулуву хьусса ца агьамсса ишну хьунни вай гьантрай Санкт-Петербурглив хьусса культуралул ирглийсса форум.
ДР-лул культуралул министр Зарема Буттаевал каялувшиндаралусса Дагъусттаннаясса делегациягу гьуртту хьунни Санкт-Петербургуллал VIII культуралул форумрай.
Бадрижамал Аьлиева
[dropcap]Ш[/dropcap]анма гьантлийсса форумрал личIи-личIисса майданнал давурттавух гьуртту хьуну, культуралул аралувусса цIу-цIусса технологиярттащал, гихуннайсса давриву аьркин хьунсса цайми-цаймигу затирттащал кIул хьунни жулва культуралул зузалт.
Цуппа Зарема Буттаева гьуртту хьунни культуралул аралувусса кIулшивуртту ласаву хьхьичIуннай даврилмур секциялий. Му секциялул модераторну бия АьФ-лул Культуралул министерствалул элмулул ва кIулшиву дулаврил департаментрал директор Наталия Шутенко. Шиккусса агьамми ихтилатругу хьуссар «Творчествалул инсантал» тIисса цIанилусса федерал проектрал лагрулийсса «Культура» Национал проектрал лагрулий, вузирдал базалий, квалификация ларай дувайсса центрдал даврийн багьайсса.
Шиккува кIицI лаган, жулла республикалул культуралул идарарттал 40 преподавательнал квалификация ларай дуллалисса Саратовуллал паччахIлугърал консерваториялул курсру бувккуну бур, Г. ХIасановлул цIанийсса МахIачкъалаллал музыкалул училищалул базалий. Уттигу 11 зузалал Краснодардал культуралул институтраву буккинтIиссар личIи-личIисса курсру.
