«Учитель, вил цlанил хьхьичl ник рищун ихтияр дула», — тlисса оьруснал хъунасса шаэр Николай Некрасовлул увкусса мукъурттийну чlалай

 бур учительнал хlурматгу-кьиматгу цуксса лавайсса бивкlссарив.

Гьамин, на школалий дуклакисса чlумалгу муничlанма гъан­сса хlурмат буссия учительнал. Партардах щябивкlсса мюрщисса оьрчlру хlарачат буллан бикlайссия цанма ххира­сса учительтураха лащан. Сайки цинявннал, ца зумату кунма, ци пиша язи бугьанна куну цlувххукун, «учитель хьунна» тlисса дикlайссия жаваб.

Учительнал ва дуклаки оьрчlал дянивсса арарду марцlсса, оьрчlал чулуха хlурматрал, учительнал чулуха жаваблувшиндарал дурцlусса дикlайссия. Гьакссагу ччивахха уттигу мукунмар бусса учин, амма къабюхълай бушиврия дакlгу ­аьсив хъанай дур.

Уттигъанну Цlуссалакрал райондалийсса Ялувмур Цlусса­чlурттащиял школалий 43 шинал мутталий дарсру дихьлахьисса Къушиева Зубайдат Рамазановнан дуллунни паччахlлугърал хъуннасса бахшиш: «Аьрасатнал кlулшиву дулаврил хlурмат бусса зузала» тlисса ларайсса цlа.

Зубайдатлул дуклаки оьрчlал мудангу хьхьичlунсса кlанттурду бугьайва райондалул ва республикалул олимпиадарттай.
«На бура яруссаннал школалий зий. Чlявуми агьалигу, дуклаки оьрчlругу ярусса бур. Мукун бигьа бакъасса коллективраву ларсъсса ларайсса бахшишралгу кьадру хъиннува лавай хъанай бур. Лакралми оьрчIру цайминнаяр махъун къабагьан ялув бацlлай бикlара», — тIий бур Зубайдат.
Учительнал даврил ккаккияну хъанахъиссар дарс дирхьусса оьрчIал хьхьичIуннайшивуртту. Зубайдатлул кlия ученик ур мусил медаллу ларсъсса, ца – арцул медаль ларсъсса.
«Цаягу ученик чlарах къалагай, дуклакими бикIу, архния шяравун зана бивкlми бикlу. Цалчинсса шиннардий пионервожатыйну зузисса чlумал дакlний ливчlмигу хъямала багьай. Цlана Новостройрайсса шяраву школалул директорну ур ттул ученик Адамов Темирбулат», — тIий, буслай бур Зубайдат Рамазановна.

Циярва чlявусса буслай бур цила даврил уртакьтурая: «Хъинну ххуйсса учительница бур жучlа Патlимат Махlаммадовна. Жагьилсса ттурчlиридуш бур Ангелина, оьрчlан хъинну ххирар мунил ингилис дарсирдайн занан. Оксана, оьрчl бувну, декретрай бур. Райондалул каялувчитуравугу чансса бакъассар жул школалул итабавкьусса, мунияту жул школа хъинну барачатссар (хъяй бур). Цlана тlурча, шанна зивулийсса, гьарицагу уттизаманнул тlалавшиннаран жаваб дуллалисса дузалшиннаращалсса школа буссар жул шяраву», — тlий, пахрулий буслай бур Зубайдат. Цала даврил уртакьтурал чулухунмай­сса хlурматгу хъанахъиссар ларайсса инсаншиврул лишанну.
Зубайдат, хъинсса учитель бакъассагу, хъинну сивсусса душ бикlайва жагьилнияцlакулва.

Самолетрая парашютращал тlанкl учинсса хIучI бакъашиву хlакьинугума гьарица хъамитайпалуву къалякъинссар. Зубайдат дуклакисса 1975-ку шиннардийва му сивсушиву ккаккан дур­ссия «Аннушка» тlисса самолетрая тlанкl учаврийну.
– Чурххал бувцlу-кьувцlуми душру хьхьичl тlанкl учин байва, куклуми тlурча – хъирив, бюхъайва му кlушиврул ччяни хъирив лавну, кувннийн кув къащунсса хlилла дикIан, — буслай бур ва.
Мяйжаннугусса учительнал лякьлул оьрчlан хъунмасса бах­тти хьуссар учин бучlир. Щищар, туну, мунаяр ххуйну тарбия бан бюхъайсса оьрчlру. Му пикри тасттикь буллалиссар Зубайдатлул цилвами оьрчlалгу, хъуними душварал, Оксанал ва Къиргъул, арцул медальлащал ва ливчlминналгу лавайсса кьиматирттащал школарду къуртал бувну бур.

– Къиргъул язи бувгьуну бур, ниттил кунма, учительнал пиша, анжагъ ингилис мазрал. Вайми душругу, арсгу, уттизаманнул тIалавшиннарду чIалай, цалва хIарачат цивппа буллай, ишбажаранчишиврухун багьну бур. Биологнал сянат лархьхьусса чIивимур душнивун, чарив къакIулну, сурат рищу хьунсса гъира бувххунни, — тIий бур Зубайдат Къушиева, цалва оьрчIаву уттизаманнул тIалавшиннардайнсса жаваб дуллалисса бюхъу-хIарачатрая рязину.
Барчаллагь учин ччай бура, гьарицагу оьрчlал хьхьичl бав­цlуну, миннан зат лахьхьин бан хlарачат буллалисса учительтурахь. Барчаллагьрайсса дуклаки оьрчlру чан къахьуннав. Учительнал цlа бюхттул хьуннав!!!
Ахирданийгу чlа учин ччай бура цинявннан цlуллушиву ва давриву тlайлабацlу.

Тамара Закарьяева