Театрданул шинал дуллалисса давурттаву А. Къапиевлул цIанийсса Лакрал паччахIлугърал музыкалул ва драмалул театр гьуртту хъанай бур Дагъусттан Республикалул Культуралул 

министерствалул кабакьулийну щурущи бувсса «Культура» национал проектрай. Мунил лагрулий октябрь ва ноябрь зурдардий Аьра­сатнал ххюва шагьрулий (Дагъусттаннал ва Ухссавнил Ккавкказуллал) ккаккан буллай бур Н.В.Гоголлул пьесалиясса спектакль «Ревизор».

Зулайхат Тахакьаева
Режиссер-постановщик – Чачаннал ва Аьрасатнал халкьуннал артист Руслан Хакишев, сценограф – Дагъусттаннал халкьуннал художник И-Х.Супиянов.
Произведение бухлай бур билаятрал лавайсса дуккаврил идарарттал ва школарттал программалувун.
КIулшиву дулаврил министерствалул кабакьаврийну спектакль уттинин Дагъусттаннай ккаккан бунни Дарбант ва Избербаш шагьрурдал студентътуран ва дуклаки оьрчIан. КIивагу шагьрулий лап ххуйну кьамул бунни жагьилтурал хъуниминнангума лаласун захIматсса пьеса. Хъирив нанисса ник классикалух лаглай душиврул хIасул буллай бур тIааьнсса асарду.

ТIайлабацIусса хьунни Нальчик шагьрулийн­сса гастроллугу. Итникьини Аь. Шогенцуковлул цIанийсса Кабардиннал паччахIлугърал драмалул театрданул сахIналий ккаккан бунни жучIава мюрщими тамашачитуран ччянива ххира хьусса, оьрчIансса спектакль «Айболит» (спектакль чIумуя-чIумуйн ккаккан бай­ссар оьрчIал багъирдаву, школа-интернатирттай, реабилитациялул центрдай, гъинтнил лагерьдай) ва «Ревизор».
Театрданул директор Ма­хIам­­мад ХIусайновлул бувсунни дуклаки оьрчIру классикалул репертуарданийн кIункIу бансса мурадрай щала Аьрасатнаву зузи бувсса проектрая. «Школарттал ва театрдал гужру цачIун баврийну кабакьу хьунтIиссар дуклаки оьрчIал мяърипатрал даража лавай бан, дунияллия ххуймур ласун», — увкунни ванал.

ХIурматрай кьамул бунни кIивагу спектакль.
Хъуннасса къулагъас дия СМИ-рдал чулухагу. Гьай-гьай, вай цалчинсса гастроллу да­къархха Лакрал театрданул Нальчик шагьрулийнсса. Хъунмасса тIайлабацIулущал ккаккан був­ссар вава театрдануву Лоркал «Бернарда Альбал къатта» (режиссер Дагъусттаннал халкьуннал артист Аслан МахIаммадов) Шекспирдул «Ромео и Джульета» ва «Гамлет» (режиссер Богдан Петканин). Гастроллая цала асарду буслай ур театрданул хъунама режиссер, Дагъусттаннал халкьуннал артист Аслан МахIаммадов («Ревизор» спектакльдануву агьаммур роль дургьусса):
— Тарбия дусса тамашачитал бур, оьрчIру хьуннав, жагьилтал хьуннав. Учайхха оьрчIру хъяврин бан къашайссар, куну.

Гайннавусса гьавасрайну чIалай бур театрдания хавар бусса, сахIналий хъанахъимур лаласун бюхъайсса ник ялун най душиву. Жунма кIулли, перестройкалия махъ тамансса шиннардил мутталий театрду цукун лащин­сса тагьарданий бивкIссарив, паччахIлугърал чулухасса къулагъасгу духларгун, тамашачигу арх увцун. Театрду ливчIун бия яхьун ягу къаяхьун тIисса тагьарданий. Махъсса шиннардий паччахIлугъ театрдайн лажинну кIура дарунни, театрдачIа ххи хьунни бунияласса проектру чулийн буккан бансса, чIаххувсса республикарттал театрдащалсса уртакьшиву, кувннал кувнначIансса гастроллу цIудуккан дансса каширду. Мунийну театрду хьхьичIунмай хъит тIутIиссар, — увкунни Аслан МахIаммадовлул.

---

Гьантри ккалай буссияв
лакрал артистал бучIаннин

-Театр нанисса баяйхту, ссавур дакъа ялугьлай буссияв, — тIий, артистуращал хьунабакьин гримернайлувун бувкIуна Гьамиящиял шяраватусса ПатIимат Хаджиева.

Аьлимирзаевхъал мяйва оьрчIащалсса хъунмасса кулпат Нальчикрайн бивзун бур 1960 шинал. Муни ПатIиматлун диркIун дур 10 шин. Ванил ппу Рамазан республикалий бусрав­сса инсан ивкIун ур, чIярусса шиннардий Нальчинский совхозрал хъунаманал хъиривчуну зий ивкIсса. Уссу ХIасан (аьпабиву) тамансса шиннардий ивкIун ур Кабардин-Балкьарнавусса Да­гъусттаннал диаспоралул хъунаману.

ЦIанакул ванил кIия уссу ялапар хъанай ур Москавлий, ца уссу зий ур Нальчик шагьрулул ГИБДД-лий. Арс АхIмад зий ур шагьрулул прокурорнал хъиривчуну, Салим – заводрал хъунаманал хъиривчуну. Душ Зулайхат – косметолог. Цуппа ПатIимат жяматийсса иширттавух чялишсса инсан чIалай бур. Гьуртту шай­сса бур концертирттай. ЧIявусса конкурсирттай балай увкуну, дипломирттан, ларайсса бахшиширттан лайкь хьуну бур.

— Ватандалия архну ялапар хъанахъисса жу лакку балайрдах хъинну мякьну бикIару, — тIий, артистал концертращал бувкIун ччишиву буслай бур ПатIимат.