Хасъсса закондалийн бувну, ва шинал 1-мур январьдания тинмай Аьрасатнаву ччи-ччиний SIM-картарду дахлан къабучIи буллай бур. Уттинин ччимур номер ва ччиссаксса гьарца шаттирал бакIрах тIиссакссагу ласун бюхълай бивкIхьурча, вания тинмай ми каних бахлан къадагъа дирхьуну дур.
Бадрижамал Аьлиева
Закондалийн бувну, хасъсса регистрациялул информация дакъа картарду дарххуминнай аьчIа дихьлан най бур, 5 азарда къурушрайн дияннинсса — физическое лицорай, 200 азарда къурушрайн дияннинсса — юридическое лицорай. Ва даву дуллай бур бигьанна SIM-картарду ларсун, личIи-личIийсса махинациярду дуллалисса, машварартту щашлашисса каругу, дакIругу марцI дакъасса инсантурал дуллалимунин ххуллу кьукьаву мурадрай. КIулсса куццуй, мира SIM-картарду ишла дуллай бур терактру дуваншиврулгу.
Закондалийн бувну, SIM-картарду дахлахими буржлувну бур чичлачисса кьутIилуву муштаринаясса информация чичаван, мунил ца экземпляргу 10 гьантлул дянив операторначIан биян бан. Операторнаннив хъирив лавну кIул буван аьркинну бур муштариная чивчумур цуксса тIайласса буссарив.
Утти бурганну Аьрасатнаву, хаснува Дагъусттаннай, ва закон цукун щаллу дуллан бикIайрив.
