[dropcap]О[/dropcap]ктябрьданул 29-нний Республикалул ХIукуматрал Председатель Артем Здуновлул каялувшиврий хьунни Дагъусттаннал министртурал кабинетрал батIаву.
Цалчин ххал бивгьунни 2020 шинайнсса Дагъусттаннал бюджетрал масъала. Мунил хIакъираву хъунмур махъ лавхъунни ДР-лул финансирттал министр Юнус Сяъдуллаевлул. Мунал тIимунийну, 2020 шинал экономикалул агьамми ккаккиярттуну хъанай дур: ВРП (валовый региональный продукт) 719,8 млрд. къурушрал — 103,7% лахъшиврул бущи хIисавну.
ХьхьичIмур шинах бурувгсса муштаринал багьрал индекс – 103,1%, харжру лахъ шаву – 106,8%. Яла агьаммур масъалану личIлай бур харжру лахъ баву. Бюджетрал проектрай харжру лахъ баврил фонд хъун баврин ккаккан дурну дур 4 млрд. къурушрал. Яла чIивимур захIматрал хIакь лахъ бувантIий бур 12 азаллий 133 къурушрайн диянцIа.
Ялун нанисса шинал республикалул бюджет бикIантIий бур 125,3 млрд. къурушрал, гьашину дучIантIими налогру хIисавну дур 4 млрд. къурушран, харжлугъ дикIантIий дур 129,9 млрд.
Жуллами (республикалулсса) налогру ва къаналогиртталми доходру хьунтIий дур 30,6 млрд.
БатIаврий ххал бивгьунни цамургу масъала – 2020 шинайнсса ва пландалийн ларсъсса 2021-2022 шиннардийнсса ДР-лул социал-экономикалул лябуккулул прогноз. Мунил хIакъираву хъунмур махъ лавхъунни ДР-лул экономикалул ва кIантту-кIанттурдал лябуккулул министрнал буржру чIумуйсса бартбигьлагьима ХIажи Султановлул. Мунал тIимунийну, прогнозрал ккаккияртту хIадур дурну дур шанна вариантрай – консервативсса, базалулсса ва мурадлувсса(целевой).
Мурадлувсса журалулмунил ккаккан буллай бур экономикалул лябуккулул анаварсса бущи, кIанттул ишбажаранчитурал дянив конкуренция хъун хъанахъаву, инвестицияртту гьарза шаву ва хъунисса инвестициярттал проектру дузрайн дуккан дуллалаву. Микку, республикалул бюджетрал ккаккияртту хIадур дуллайни, ишла дурссар базилулмур вариант. ХIакьинусса кьини ВВП-луву хъунмур бутIа бур машлул – 27%, шяраваллил хозяйство – 17,2%, къатри дуллалаву – 15,1%. 9 зурул хIасиллайну республикалий промышленностьрал производствалул индекс хIисавну бур 113,2%.
2020-2024 шиннардий промышленностьрал производствалул лябукку хьун най бур шинай дянивну 8,4%. Миккун хIисаврайн ласласиссар дузрайн дуккан дуван хIадур дуллалисса «Каспийск» ва «Дагестанские Огни» ТОССР-дал ва цаймигу шагьрурдайсса инвестициярттал программартту, республикалул хъунисса заводирттал давуртту лядуккан даву, паччахIлугърал обороналул заказру гьарза даву.
Артем Здуновлул тIимунийну, къулагъас хъун дуван аьркинну дур промышленностьрал кооперациялух.
