Итни кьини Миатлинский ГЭС-райн республикалул изданиярттал журналистал ва блогертал гьурттусса пресс-тур хьунни. Ва аьрххилул мурад бия «РусГидро» ОАО-лул Дагъусттаннал филиалданул Миатлинский ГЭС-райн Австриянава №1 гидроагрегатрай дишинсса нигь ларсун бувкIшиву бусан ва цуппа ГЭС-рал ялтту бувккун, чIирисса экскурсия даву.
З. АьбдурахIманова
Станциялул гидротурбиналул оборудование даххана дуллай, цIу дуллай бусса бур «РусГидролул» кьамул дурсса комплексныйсса программалул хахливу.
Жу станциялийн бувкIсса чIумал машинарттал залданувун сайки 120-сса тонна дусса нигь ва мунил бутIри ликкан буллалисса даву най дия.
Оборудование ликкан дуллай бунагу, жущал ихтилатрайсса «РусГидролул» Дагъусттаннайсса филиалданул хъунама инженер Мухтарпаша Сяидовлул бувсуна, Австриянал Санкт-Пёльтен тIисса шагьрулийсса Voith Hydro заводрая нигьирал транспортировка дуллай сайки ца барз лавгшиву. Цал ва диян дурну дур Австриянал Линц тIисса неххайсса портрайн, тичча Дунай неххайх жамилий румыннал Констанца тIисса шагьрулийн. Тиччагу Новороссийскалийсса складрайн томоженныйлул давурттив къуртал хьуннин.
«Станциялул гидроагрегатрал нигь даххана дуллалисса даву мартрай дуллай байбишинтIиссар. Ва хъуннасса даву дайдишиншиврул жул филиалданул Гидроремонт – ВВК-лул строительно-монтажрал давурттив дайсса подрядчиктал хасъсса кIулшивуртту ласун тIайла бувккун бивкIссар Австриянал Voith Hydro заводрайн», — бувсунни хъунама инженернал. Нигь жучIанна диян даврил хIакъиравусса кьутIи «РусГидролул» ва Австриянал заводрал цIакь дурну диркIссар 2011 шинал. Модернизациялия махъ гидросиловое оборудованиялул даву мюхчансса хьунтIиссар ва ремонтирттан лагайсса чIун чIири хьунтIиссар.
Австриянал Voith Hydro заводрал филиаллу бусса бур дунияллул цаппара хIукуматирттай. Цурда нигь Австриянаву дартIун щаллу дурхьурчагу, ванил бутIри бувну бур Бразилиянал Сан-Паулу шагьрулийсса заводрай ва мукунмасса Испаниянавусса заводрайгу.
Сан-Паулулийн лавгун бивкIссар, Мухтарпаша Сяидов гьурттусса, «РусГидролул» комиссия. Ванал бусаврийну, Испаниянавасса оборудованиялул бутIри ттигу биян бувану бусса бур.
Хъирив станциялул пишакартурал жу бувцунну экскурсиялий. Гидростанциялул чIанулу кунма гьанагьисса гидроагрегатрал нигьирал чIу бия вичIахух бишлайнма. Шикку гидроагрегатрал машинистну зий ия жула лакку оьрчI, Мукьардал шяраватусса Аьбдуллаев АхIмад. Станциялий АхIмад зий шанна шин дусса дур.
Яла жу лавгру плотиналийнгу. Миатлинская ГЭС бур Сулакь неххай Казбековуллал райондалийсса Миатли шяравалличIату арх бакъа. Станция зузи бувссар 1986 шинал. Ванил мощность дур 220 МВт, машинный залдануву 2 гидроагрегат зий бур. Миатлинский водохранилищалува най дусса дур МахIачкъалаллал ишла дуллалисса щин.
