Лакрал райондалул бакIчину зузиссаксса мутталий Юсуп МахIаммадов лакрал миллатран кIул хьунни,
так цала канилусса район ччаннай дацIан даврил цIаний акъасса, щалагу Лакку билаятрал ва миллатрал кказитрах ва театрданухгу мудан ххисса къулагъас дуллалисса чIарав ацIан хIадурсса иялчу хIисаврайгу.
ХIасил ва гьуртту шай лакрайн багьайсса гьарцагу агьамсса иширттавух.
Байрандалийн бувкIминнан хIисав къавхьуну къаливчIунни Юсуп МахIаммадовлул ужагърай буттахъал аьдатирттал хIурмат бюхттулсса кIанттай бушиву. Байрандалул агьаммур къушлий хIакьсса лакку дукрардал ссупра тIивтIуну бия ванал кулпат МухIадлул душнил ПатIиматлул.
Миллатрал лаххиярттаву хъамал кьамул буллай бия душру ХIабибат ва Зунзул, бия уссур-ссунналми душругу. Исвагьисса чиллу-чухъравусса АсхIаблул ва Адамлул (ХIабибатлул ва Зунзуллул арсру) чIарах цучIав уклай акъая, сурат къарирщуну.