Сентябрь зурул 3-нний 60 шин хьунтIиссар цалла цIа агьалинаву сийлий ва бусравну личIансса чIяру-чIярусса ххуй-ххуйсса давурттив дурсса аслийсса зунтталчунан, Къяннал шяраватусса Оьмаров ЖахIпардун.

ПатIимат Рамазанова
Увну ур ва шяраваллил агьул­данучIа хIурматрайсса Пир­махIаммадлул ва ХIабибатлул кулпатраву. Къянив 8 класс къуртал бувну бур, Вихьлив – 10 класс.
Мура шинал дуклан увххун ур Грозный шагьрулий навтлил институтравун, строитель шайсса факультетрайн.
Институт къуртал бувсса 1975 шинал гьан увну ур Ижевск шагьрулийн, амма нитти-бутта бумур кIанайн дакI кIункIу тIий, ца шинава Къизлардайн зана хьуну ур. ЖахIпардул нину-ппу яхъанай бивкIун бур Къизлардал райондалийсса Шаумян тIисса шяраву. ЖахIпаргу миккува «Дагсельстрой» трестрал идаралий цал мастерну зий ивкIун ур, яла тамансса шиннардий мура идаралул хъунаману ивкIун ур.
2002 шиная шинай зий ур Пенсионный фондрай, цIанакул зий ур пенсияртту биян байсса «Намус» тIисса идаралул хъунаману. Ва мудангу цува зузисса кIанай цала чулухунмай хIурмат багьанну зунгу, къуццу тIунгу кIулсса зунтталчу ур. Цалла даву ларайну кIулсса пишакар ур, архIал зузиминнал, кIулминнал дянив хIурматрай ур.
Ххишала бакъа инсаншиврул бутIа буллусса ЖахIпардул ххаллилсса цайми давурттивгу дур­ссар, буттал шяраву Къянив ванал ххуйсса мизит бувссар. Лакку билаят хъинну ххирасса ванал буттал шяраву ххаллилсса къатригу дур­ссар. Гьарцаннащал хIал бавкьу­сса, учин-бусан кIулсса ЖахIпар ххуйсса тIуллацIун, тIивтIусса аьмалдануцIун ва дугъришивруцIун ххира хьуну ур шяраваллил агьулданунгу, цачIу зузиминнангу, дустуран, гьалмахтурангу.
ЖахIпардул цIа хIурматрай зумух ласай Къизлардал даралувусса лакрал агьалиналгу.
ЖахIпардул ххуйсса тарбия дуллунни ххювагу душнингу, арснангу. Арс Оьмар, ппу кунасса строитель хьун, ккалай ур Ростоврай инженертал-строительтал хIадур байсса университетраву.
Ниттин цIасса яла чIавамур душ ХIабибатмур, ЯтIул дипломращал Дагъусттаннал университетрал экономикалул факультетгу къуртал бувну, цIанакул аспирантуралуву дуклай бур. Хъуними душру личIи-личIисса давурттай зий бур. ЖахIпардул цалва душвавраву, арснаву ва душвавралми оьрчIавугу лакку кIану ххирашиву, цIимилул ка тIитIаву, лагма-ялттуминнахсса ччавугу, хIурматгу тарбия бунни тIий бур шяраваллил агьлу, мунал наслулия рязийну. Ва яла-яларив, шяраваллил тарихраву мусил хха личIансса давурттив дурсса ЖахIпардул юбилей кказитрайхчIин барча дуван ччисса чансса бакъар.
Барча вил юбилей, ххаллилсса буттал ххаллилсса арс ЖахIпар ПирмахIаммадович! Имандалул дакI чанна лархъма! Вил дакIнийцири мурадру бартлаганнав, вила наслулул ва оьрмулул ххари улланнав. Ина буттал шяраву Аллагьнаха эбадат дан, чак бан, Кьуръан буккин Аллагьнал Къатта бувсса инсан ура. Идавсил (с.аь.с) увкуну бур? «Щил бунугу буварча мизит, къакъунттул кюруксса бунугу, Аллагьнан мунан Алжаннаву къала бантIиссар», — куну. Аллагьнахлуну дакI марцIну ина бувсса мизитрая чиригу хъунмассар. ЦIуллушиву дулуннав вихьхьун, вил дуаьрдугу, вихасса зукьлурду, дуаьрдугу Аллагьнал кьамул дуваннав.