Ларгсса ххуллункьини МахIачкъала шагьрулул КIулшиву дулаврил центрданий
хьунни лакрал шяраваллал фондирттал вакилтурал хьунабакьаву. Соцсетирдая жунма кIулли цаппарасса лакрал щархъаву жагьилтурал сипталийну сакин бувсса, шяраваллу хьхьичIуннай даврил цIаний зузисса, фондру бушиву.
Зулайхат Тахакьаева
Дачин дурну ия хьунабакьаву Шахьуйннал шяраваллил фондрал каялувчи Аьбдулла Аьлиев.
ХIакьину лакрал миллатрал хьхьичI бавцIусса буруккинттая ихтилат бунни журналист Илияс Къапиевлул, буруккинну ванал кIицI лавгунни глобализациялул щатIуву лакку маз бухлагавриясса нигьачIаву хъуннасса душиву.
Ванал ихтилатрая махъ хьунни фондирттал презентация. Гьарцаннал ккаккан дурунни фондирттал сипталийну дурсса давурттая бусласисса видеороликру.
[dropcap]Л[/dropcap]акрал шяраваллал фондирттаву цалчин хIасул хьусса, лакрал дянив бакъассагу, сайки щала республикалийгума иш бавчусса Щардал шяраваллил фондрая буслай, щарнил бакIчи Мирослав Ибрагьимовлул кIицI лавгунни фонд сакин бансса хIуччану хьушиву Надир Хачилаевлул махъру: «Жула бияла жула кIунттихьхьун ласун аьркинссар», — тIисса. Бувсунни шама-мукьа инсаннал сипталийну зий байбивхьуну, хIакьинусса кьининийн тамансса мурадру дузрайн буккан бан бювхъушиву.
ДакIнийн бутанну, Щардал фондрал кашилуцIух шяраву бувшиву зунттал кIанттай чувчIав бакъасса даражалийсса ттуплий буккай майдан «Щара-арена», дурцушиву щин, школа багьну бушиву «100 школа» тIисса программалувун.
[dropcap]К[/dropcap]куллал шяраватусса АьвдурахIман Кьадинаевлул бувсунни, шяравун туристал кIункIу бансса мурадрай, Инстаграм сетьрай @pastukh тIисса аккаунт хIасул баврия ва мунил тIайлабацIулия. Ванал бур чIявусса подписчиктал, цивгу Лаккуйн зунттавун бучIан ччисса. Ва аккаунтрайхчил ларгсса шинал шяравун увкIун ур 20 турист.
Ххюлуссуннал шяраваллил фондрая, дурсса давурттая бувсунни мунил давриву чялишсса гьурттушинна дуллалисса Оьмар Къунжуевлул.
«МарцIсса ватан» тIисса Ккурккуллал шяраваллил фондрая бувсунни Ислам Аьбдуллаевлул. Ларгсса шинал, ччюрк духхай машинагу машан лавсун, ва фондрал чIярусса акциярду дурну дур цала шяравалу ва лагма-ялттусса кIанттурду марцI бансса.
ЧIарттал шяраваллил бакIчи Микьдар Аьвдулмажидовлул бувсунни фондрал каширдацIух бакьин бувшиву ЧIаравсса ва КIундивсса ххуллу.
ГьунчIукьатIрал шяраваллил фондрал дурсса ва дан дакIнийсса давурттая бувсунни Халипа ТIагьировлул. ЦIана фонд зий бусса бур Хъун дяъвилия зана къавхьуминнал аьпалул аллея баврил даврицIун кабакьлай.
Сурхай ХIаживжараевлул бувсунни Къуруллал шяраву фонд цалсса бакъашиву. Амма буттал кIанттуй дакI аьтIисса волонтертурал сипталийну бакьин бувну бур мизит, ххуллу, чIарав бацIлай бур кумаграх мюхтажсса инсантурал.
Цалчинмур ЦIувкIуллал фондрая бувсунни МахIаммад Юнусовлул. Фондрал хьхьичI бивхьусса мурадну бур ххуллурду бакьин баву, шяраваллил чIалачIин ххуй даву. Пикрилий бур шяраву сакин бан АхIмад-хан Султаннул ва цIанихсса пагьламантурал — Абакаровхъал ва Рабадановхъал музейрду.
Аьбдулла Аьлиевлул бусаврийн бувну, Шахьуйннал фондрал сипталийну байбивхьуну бур шяраву мизит буллай. Вайннал сипта хъинчулий ккарккун, шяраваллил жяматгу чялишну хIала бувххун, уттинин рартIуну дур диялсса арцу.
«Гъази-Гъумучи» фондрая бувсунни Ися Бархаевлул.
Лув-ялув мукьра шинал хьхьичIунну бартбигьин бювхъусса «Лакку улклул Кубок» ва «Лакку улклул Лига» проектирдая бувсунни Илияс МухIуттиновлул.
[dropcap]Р[/dropcap]аджаб Раджабовлул бувсунни Хъурхърал фондрал дайдихьуну хьушиву ккарччал хIакин ОьмархIажи Наибовлул сипталийну ва кашилуцIух шяраву ттуплий буккайсса майдан баву. Аьдатравун дагьну дур гьарца шинал шяраву жагьилтурал кьини давугу. Ва кьини личIи-личIисса спортрал тIуркIурдай ххув хьусса жагьилтурал цанна бахшишран дуллусса арцу харж дуллай бур шяраваллил иширттан. Муния махъ хьунни фонд сакин бан ччиминнан кабакьулуцIунсса тренинг «Сакин бува фонд» тIисса. Му бачин бувну ия «РахIму-цIимилул дустал» тIисса ихIсандалул фондирттал ассоциациялул ялувма Тимур ХIажижавраев.
