[dropcap]Ч[/dropcap]Iявусса илгу тамашалийн бавтIун, хъуннасса сийлий шай гьарцагу шинал Лакрал театрданул Интнил хьхьунин хас дурсса концертру,хъинну яргсса, авадансса дикIай мунил программа, аьдатрацIун бавхIусса балайрду, аслийсса халкьуннал балайрду, тIуркIурду, къавтIавуртту. Гурсса дия гьашинумур Интнил хьхьунил байрангу.
Ссаву дия ва базилухсса байрандалул ляличIишиву чирча, му так хъярч-махсарардал, тIуркIурдал, балайрдал ва къавтIавурттал авадансса программалийну дакъаяча, сайки мукьра ссятрайсса концерт дайдирхьуну къуртал хьунцIа балайчитурахун руцлай бия цIанихсса музыкантътал: Арслан Шахмарданов (аккордеон), Карин Кьадинаев (гармун), ХIусайна ХIусайнаев (зюннав), Амрет ХIусайнаев (мандолина), Ислам МахIаммадов (дачIу).
Лакрал театрданул проектирдай гьуртту хьун гъирарай бучIай лакрал ва республикалул цIанихсса балайчиталгу. Ва базилух бия: Рамазан Фаталиев, Тарият Сулайманова, Хиринду-Сафи Султанова, къавтIаврил ансамбль «Ватан». Концертрай гьуртту хьунни мукунма Загьидат Муслимова, Жанна Кьурбанова, Аьли Абакаров, жагьилсса балайчитал РавхIаният Зайпуллаева, ЦIаххуй МахIаммадов.
Программалий гьурттуну бия театрданул сайки цинявппа артистал ва балетрал труппа.
ДайлиртIуна концерт балетрал къавтIалтрал аслийсса лакку къавтIаву «Къиссу» щаллу даврийну.
Усттарну концерт дачин дурну бия Шамсуттин Къапланов ва Саният Рамазанова.
Зулайхат Тахакьаева
