Композиторнал цалчинсса бунияласса произведение щаллу бувну бур У. ХIажибековлул цIанийсса Азирбижаннал ПаччахIлугърал консерваториялул хъунмур залдануву 1949 шинал. Му чIумал микку хьуну дур чIава композитортурал сочинениярттал концерт.
Му чIумалла дурну дур Мурад Къажлаевлул машгьурсса аьрали балайрдал цалчинсса аранжировкарттугу, цал машгьуршивугу ттигу-шилагу яларай къархьусса. Му чIун ккаллину дур Мурад Къажлаевлул творчествалул ххуллул дайдихьулун.
1953 шинал хьуну бур аьрали темалийн багьайсса мунал цалчинсса хъунмасса симфонический произведениялул премьера – «Памяти 28 героев-памфиловцев» симфониялул поэмалул, цивугу фортепианолул сольнаймур партия цалла авторнал щаллу дурсса.
Студентну унува, 1954-ку шинал, СССР-данул Композитортурал союзравун кьамул аврилва цал ххишалану тасттикь буллай бур гиччава най уна гьунар бусса жагьил ивкIшиву Мурад.
1955 шинал, Консерваториягу къуртал бувну, зана хьуну ур Дагъусттаннайн.
Шийх ванал чирчуссар Дагъусттаннал халкьуннал творчество гьанулун ларсъсса сочиненияртту. 1957 шинал Дагъусттаннал радиолучIа сакин бувссар симфониялул оркестр. Щалва билаятрайх гастроллай занан ивкIссар «Дагъусттаннал композитортурал симфониялул музыка» тIисса программалущал. 1963-ку шинал хьуну бур США-навунсса ванал цалчинсса аьрххи, микку маэстро Дюк Эллингтоннул щаллу дурну дур ванал сочинение («Концерт для джаза – Африканский»), цувгу гихуннай лайкь хьусса Ярослав Ежеклул цIанийсса премиялун. 1993-1996-ку шиннардий Мурад Къажлаев увчIуну ивкIссар АьФ-лул ПаччахIлугърал Думалул депутатну.
Мурад Къажлаев 20 шинал мутталий каялувшиву дуллай ивкIссар ГостелерадиолучIасса Юрий Силантьевлул цIанийсса Академиялул концертрал Хъунмасса оркестрданий. Мурад Къажлаевлул каялувшиву дуллалисса шиннардий оркестр лайкь хьуссар ларайсса титуллан.
Композиторнал оьрмулувусса хъунмасса иширан ккалли хъанай бур 1968-ку шинал Ленинградрай хьусса мунал «Горянка» балетрал премьера – Дагъусттаннал Миллатрал цалчинсса балетран хIисавсса. Му балетрахлу Мурад Къажлаев лайкь хьуссар РСФСР-данул паччахIлугърал М. Глинкал цIанийсса премиялун. Му балетрал гъира-гьавас гьаз бувну, Дагъусттаннай тIивтIуссар Опералул ва балетрал театргу.
Мурад Къажлаевлул чирчуну дур 400-нния лирчусса сочиненияртту. Ванал чивчуну бур 42 кинофильмрансса музыка, миннувух – Дагъусттаннал цалчинсса кинофильм «Тучи покидают небо».
2008-ку шинал Мурад Къажлаевлул Дагъусттаннай тIивтIуссар гьунар бусса оьрчIансса Республикалул искусствалул школа, хIакьинугу муний каялувшиву дуллай уссар. Му школалучIава мунал сакин бувну бур республикалий цалчинсса музыкалул культуралул музей.
Гьунар бусса оьрчIал дуккавриву ишла буллан куну, ванал чивчуну бур кIива альбомгу, ми щалагу Аьрасатнал оьрчIал музыкалул школарттайх ппив хьуну бур.
Аьрасатнал музыкалул культура хьхьичIуннай давриву бивхьусса захIматрахлу Мурад Къажлаев лайкь хьуссар билаятрал ва Дагъусттаннал яла лахъми орденнан, АьФ-лул паччахIлугърал премиялул лауреатнал, Австриянал, Чехословакиянал, Кореянал, Италиянал дунияллул халкьуннал даражалийсса премиярттал лауреатнал цIардан, мукунна РАЕН-лул академикнал ва профессорнал ларайсса титуллан.
