[dropcap]В[/dropcap]ай гьантрай ЦIуссалакрал райондалул делегация гьуртту хьунни Къирим АьрасатнацIун цачIун хьуну 5 шин шаврин хас дурсса шадлугърал даражалийсса хьунабакьаврий.
Сакуллал райондалий хьусса дусшиврийсса аьрххилий гьуртту хьунни ЦIуссалакрал райондалул хъунама ХIажи Айдиев, ДР-лул Халкьуннал Мажлисрал депутат Мавлидин Исламаьлиев, ЦIуссалакрал райондалул Культуралул управлениялул хъунмур ХIабибат Буттаева, райондалул Культуралул къатлул директор Башарат МухIадова, ЦIуссаккуллал школалул дуклаки оьрчI Батирхан Султанов.
Имара Саидова
Махъсса ппурттуву Къиримнал бачIижазира ва Сакуллал район хьхьичIуннай хьунни ва шикку тамансса дахханашивуртту хьунни. Шикку буллай бур цIу-цIусса оьрчIал багъру ва ххуллурду. Му бакъассагу, шиная шинайн цIакь хъанай, гужлан хъанай дур ЦIуссалакрал ва Сакуллал районнал дянивсса дусшиврийсса арарду.
Хьунабакьаврин хас дурсса байран хьунни Сакуллал Культуралул къатлуву. СахIналий ккаккан дунни 5 шинал мутталий кIирагу райондалул дянивсса дусшиврул гьанурду бивзсса куц бусласисса видеофильм.
Хъамалу бувкIсса делегациялухь барчаллагь тIутIисса ихтилатру бунни Сакуллал райондалул советрал председатель Николай Россоловлул, райондалул администрациялул хъунмур Галина Мирошниченкол ва цаймигу делегациярттал.
Мукунма ва хьунабакьаврий асар хьунсса ихтилат бунни ЦIуссалакрал райондалул бакIчи ХIажи Айдиевлул.
Тамашачитурансса бахшишну хьунни Дагъусттаннал халкьуннал балайчи ХIабибат Буттаевал балайрду. Къиримнаха чирчусса назмурду дурккунни Батирхан Султановлул.
Вава аьрххилул лагрулий Ивановка тIисса шяраву кIирагу райондалул делегациярттал цачIуну бувгьунни мурхьирдал аллея.
Мукунма, март зурул 18-нний, ЦIуссалакрал райондалул бакIчи ХIажи Айдиевлул сипталийн бувну, Совет Союзрал Виричу, гвардиялул сержант, Аьхьхьахъиял (Ахвахуллал) райондалиясса МахIаммад-Загьид Аьвдулманаповлулгу цIа дусса вирттал-разведчиктурал гьайкалданучIа дирхьунни тIутIив. Бунни музейрдавунсса ва тарихийсса кIанттурдайнсса экскурсиярдугу.
