Композитор, дирижер, СССР-данул, АьФ-лул ва ДР-лул халкьуннал артист Мурад Къажлаевлул творчествалул 70 шинал ххуллун хасну,
цIанакул жулла республикалий нанисса «Дагъусттаннал композитортурал музыкалул панорама» тIисса цIанилусса Республикалул фестивальданул лагрулий, М. Горькийл цIанийсса Оьруснал театрдануву хьунни симфониялул музыкалул вечер.
Муний гьуртту хьунни ДР-лул ХIукуматрал председательнал цалчинма хъиривчу ХIажимахIаммад ХIусайнов, ДР-лул культуралул министр Зарема Буттаева ва чIявусса цаймигу къуллугъчитал.
Мажлис байбивхьуна Зарема Буттаевал. Ванил барчаллагь увкуна хасну ва шадлугъравух гьуртту хьун жулла республикалийн увкIсса бусравсса хъамаличу, Ярославуллал симфониялул оркестрданул дирижер, АьФ-лул халкьуннал артист Мурад Аннамамедовлухь. ДР-лул ХIукуматрал председательнал цалчинма хъиривчу Анатолий Карибовлул чулуха мунан буллуна Барчаллагьрал чагъар. ЦIа дурксса дирижерналгу барчаллагь увкуна республикалул культуралул министрнахьгу, Мурад МахIаммадовичлухьгу, ва хьхьуну залданувун бавтIсса тамашачитурахьгу.
Гихуннай Мурад Аннамамедовлул каялувшиндаралу Дагъусттаннал паччахIлугърал опералул ва балетрал театрданул симфониялул оркестрданул ххаллилсса концерт ккаккан дунни. Щаллу дуруна Мурад Къажлаевлул сочиненияртту.
Шиккува кIицI лаган, «Дагъусттаннал композитортурал музыкалул панорама» фестивальданул лагрулий уттигу хьунтIиссар кIира вечер: мартрал 22-нний – Халкьуннал инструментирттал оркестрданул концерт, мартрал 29-нний – камерданул музыкалул вечер.
Фестивальданул даву дайлитIунтIиссар апрельданул 5-нний, Къумукьнал театрдануву, вокалданул-симфониялул музыкалул концертрайну.
