Бухьхьияра «ОьрчIал луттирал нюжмардийн»
Гьарца шинал, инттухуннайсса каникуллал чIумал, жулва билаятрай дувай «ОьрчIал ва чIава жагьилтурал луттирал нюжмар».
Гьашину жулла республикалий ва акция шадлугърал тагьарданий тIитIинтIиссар мартрал 22-нний ссят 11-нний Дагъусттаннал паччахIлугърал Ссихьрал театрдануву. Гихуннайсса, нюжмардул лахъишиврийсса, мартрал 25-нния апрельданул 2-ннийн дияннинсса, шадлугъру хьунтIиссар Нураттин Юсуповлул цIанийсса Республикалул ОьрчIал библиотекалий.
Бадрижамал Аьлиева
Ва ххаллилсса акциялул таварих байбихьлай бур ларгсса ттуршукулул мукьцIалку шиннардия – захIматсса, дяъвилул лухIи-цIан лаган дурсса 1943-ку шинал, оьрчIал чичу Лев Кассиллул сипталийн бувну, махъсса чичултрал пикри бувну бур, щавурду дирминнах буруглай, душманнансса дайшишрурду дуллай, хъуниминнан кумаг буллалисса оьрчIансса байран дуван. ОьрчIансса луттирал кьинилул байран цурдагу дурну дур Союзирттал Къатлуву, бусравсса хъамалнугу бивкIун бур оьрчIал чичулт – Лев Кассиль, Самуил Маршак, Корней Чуковский. Цалчинна-цалчин Москав шагьрулул оьрчIан куну дурсса му байран махъ щалвагу билаятрайх ппив хьуну дур.
Гьашинумур шин ЮНЕСКО-лул баян бувну дур «БикIлил миллатирттал дунияллул халкьуннал дянивсса шинну» («Международный год языков коренных народов»). Аьрасатнал Президентнал тIурча, ва шин баян бувунни Театрданул шинну. Гьашинумур «Нюжмардул» программа сакин дуллалиминнал вай кIанттурдугу хIисавравун лавсун бур.
Мартрал 22-нний Ссихьрал театрданувун ва акция тIитIлатIисса шадлугърайн наними хьунабакьлантIиссар оьрчIал луттирдавасса геройтурал яннардавусса артистътурал, театрданул жанахIраву дикIантIиссар оьрчIал луттирдал «С книгой мир добрей и ярче» тIисса цIанилусса выставка, микку хьунтIиссар чичултращалсса, шаэртуращалсса хьунабакьавуртту. Гихуннай ва акциялул гьурттучитурах ялугьлай дуссар хъуннасса ва хIазсса программа. Ва кьинимур байран щаллу хьунтIиссар Ссихьрал театрданул ккаккан бувсса «Чиполлино» спектакльданийну.
Акциялул лагрулийсса давуртту хьунтIиссар республикалул районнал ва махъсса шагьрурдал библиотекарттайгу.
Республикалул оьрчIал яла хъунмур библиотекалий тIурча, нюжмардул мутталий оьрчIах ялугьлантIиссар кIива залдануву: байбихьулулми классирттал оьрчIах – кIюрххил ссят 11-нний; лавайми классирттал оьрчIах – ахттайнмай ссят 12 хьуну. Бухьхьияра вай шадлугъирттайн: бава-ттаттахъащал, нитти-буттахъащал, уссурсуннащал. Зух ялугьлай дуссар хъуннасса ва хIазсса программа: хьунабакьавуртту, выставкартту, конкурсру ва м.ц.
