![](http://ilchi.beget.tech/wp-content/uploads/2019/03/original.jpg)
Сси-къащилул литIун бувсса клеткардах
алхIам ккалай къаличIаншиврул
Циванни щаллагу дунияллийх Европанал билаятирттай яхъанахъисса хъами, оьрмулул 50 шинава ливчуну махъгу, жагьилнува, сахIибулхайр дуну, симанная пиш бухкъалаглай бур тIисса бусаларду ппив хьусса? Циван бикIави, цанма цивппа ххирасса ва цала цIуллу-сагъшиврул кьимат кIулсса буну тIийри тIар.
Американал машгьурсса журналистка Ребекка Плантьердул «Караматсса хъунмав шаврил дарсру: паланг хъаннил кьюлтIсса маслихIатру» тIисса цила луттирай чичлай бур: «Мисалдаран, Флоридалий ва Калифорниялий ялапар хъанахъисса хъами 50 шин хьуния тихунмай, «Хьумур хьувча!» куну, цаятура цала кагу ларсун, ялапар хъанай буссар. Бакъассар цала чурххай ххишаласса дикI дишаврих буруглай, дакъассар къулагъас цала лякьлуй къадагъа дишаврих, курчIилну буссар лажиндарайсса ва каруннайсса бурчуха аякьа дуллан»,- тIий.
[pullquote]Лажиндарай жигдатIру дакъаччишиву – му психологиялул диялдакъашивур. Цила чIумун лархьхьуну, ми дикIан аьркинссар.[/pullquote]
Гихунмай журналистка цуппа Парижлив ялапар хъанахъисса ппурттуву гайннал хъаннил багьу-бизулия, хасиятирттая, гьар кьинисса къайгъурдая, хъирив бавцIуну бивкIсса кунма, буслай бур.
«Дахьва Палангнавун бивзсса чIумал, на ябатIин къабюхълай бикIайссияв оьрмулул бугьарасса паланг хъанния. Дакъая гикку ккалли-сан гьар кIанай дусса пластикалул операциярттал модагу. Рязину цала оьрмулул шиннардиягу, цала цIуллу-сагъшиврух къулагъас дуну бия. Яла-яла, симаннай пиш чан къабайва, къабикIайва я-бакIру бутаву ва гьарзатрая рязибакъашиврул гъургъурду».
КIицI лаганну Ребеккал луттиравасса, паланг хъаннилгу ишла бувайсса, цаппара маслихIатру.
1. ЧIявуну буллали хъярч-махсартту. Сси-къащилучIагума ссавур дурну, хъярчирайсса бакъа, махъ маучари. Сситтулли зула цIуллу-сагъшиврун хъунмур зарал биян байсса. Медициналул хъиривлаявурттайн бувну, сси-къащилул цIаний ливтIусса нервардал клеткарду жула чурххардиву цIу къалагайсса бусса бур.
2. Яла-яла, ссавурданий, анавар къабувккун, дукира дукра. Дукаймургу дукира чанну, зула канихьсса бушкъапрай чIивисса порция бивхьуну. Гьантлун ххюйлла-ряххийлла дукира, амма чан-чанну дирхьуну, ххуйну ккурхIуну. Анавархъиндарай дукарча, лякьагу ду-дакъацириннул дуцIин дурну, учалалий тIийкун, зунма зува душман хьуну лякъаруча.
3. Палангнал бугьарасса халкьуннан хъинну ххирассар, туристал хьуну, цала тарихийсса мюрщи шагьрурдайх занан. Ххирассар кIинттул лыжардугу ларсун, зунттавусса патирдаву нюжмар-кIира дан, теннисрай буклан. Отпускрал гьантригу паланг хъаннил цала хьхьирил зуманий гьан къабайвача, чил билаятирттайн лавгун, чил культуралущал, багьу-бизулущал кIул хьунмур байва.
4. Франция ца яла пластикалул хирургия итххярхсса, медициналуву цIа ларгсса кIанур. Амма къаххирая гайннал хъаннин ботоксру ва уттизаманнул авур дай процедурартту. 50-55 шинавусса хъаннил лажиндарай жигдатIру дакъашиву миннан ккаллийнугума дия психологиялул ца диялдакъашиврун. Амма ххирая цала карунниха, кIизуха аякьа дуллан. Ччаннай даркьусса ва тIааьнсса уссахгу, ми цуксса ххирасса дунугу, арцуйгу мяш къашайва. Чурххайнгу, начру-нигьругу кьадиртун, га цанна дакI даркьумур дакъа къалаххайва.
ХIадур бувссар
Залму АьбдурахIмановал