Дагъусттаннал Росгвардиялул хъунаманал кумагчи, полициялул полковник Константин Шиян гьуртту хьунни МахIачкъалаллал 11-мур гимназиялий хьусса шадлугърал мероприятиялий.
Байран дайдирхьунни Аьрасатнал ттугъ ссавлугърай лагма букан баврийну. Хъирив гимназиялул мюрщи аьралитурал ккаккан дунни цала гьунарду ва строевой хIадуршинна, увкунни аьрали балайрду.
Константин Шияннул барчаллагь увкунни учительтурал коллективрахь оьрчIру Ватан ххирану тарбия баву мурадрай бихьлахьисса захIматрахлу.
— Жу мукIру хьуру ва гимназиялий лайкьсса ник тарбия дуллай бушиврий. Жула билаятралгу, республикалулгу тарихрава чIалай бур дагъусттанлувтал гьарица иширттаву хьхьичIунмайну бивкIшиву, жула чиваркI тачIавгу хьхьарасса къабивкIшиву.
Буттал кIанттул цIанийсса Хъунмасса дяъвилия байбивхьуну цаймигу жула республикалий хьусса иширттайн бияннин жула арантуннал ккаккан дурссар цала къучагъшивугу, яхIгу, душманнайн данди бацIан хIадуршивугу.
На мукIрура, зул дянивагу букканшиврий жула республикалул цIа бюхттул дансса къучагътал, — увкунни К. Шияннул. Гимназиялул директорнал хъиривчу Гульмира Алескеровалгу барчаллагь увкунни хъамаллурахь.
ХIадур бувссар
А. Аьбдуллаевал
