Португалиянал хъуншагьру Лиссабоннай хьунни тайбоксрал Европанал чемпионат ва Европанал первенство. Командарттавату Аьрасатнал цачIундур командалул бувгьунни цалчинмур кIану.

ХIасан Аьдилов
Тамансса захIмат бивхьунни жулла республикалул спортрал школардаву вардиш хъанахъисса оьрчIалгу. Балугъравун бувх­миннал кьюкьлуву Европанал чемпионтал хьунни Аьбдулкерим Салаватов (45 кило) Къизлар шагьрулийсса КДЮСШ, Аллагьверди Рамазанов (48 кило) Къизлардал КДЮСШ ва Хочбар Айгубов (60 кило) Хасавюртуллал СДЮСШОР. КIилчинми кIанттурду бувгьунни Набати Кемраннул (57 кило) Буйнакскаллал ДЮСШ ва Къап­лан Абуковлул, Д. Кьасумовлул цIанийсса ДЮСШ.
Юниортурава мусил медаллу ларсунни Хасавюртуллал СДЮСШОР-данийн заназисса шама оьрчIал – НурмахIаммад Расуловлул (45 кило), Арслан Юсуповлул (57 кило) ва ХIажи Аьбдулкьадировлул (86 кило), мукуна Д. Кьасумовлул цIанийсса ДЮСШ-лул вакил ХIажимурад Амирхановлул (71 кило). Спортсментал Европанал чемпионатрайн хIадур хъанай бивкIссар Н. Новгородрай ва Избербаш шагьрурдай.
ДР-лул цачIундур командалул хъунама тренер Аьбдулнасир Мажидовлул бувсъсса куццуй, жулла командалува­сса урчIагу оьрчIал уттигу цал ккаккан бунни цивппа лавайсса даражалул тайбоксчитал бушиву ва лайкьну ччалли буклайгу бушиву. Амма хIасиллу ца­хъисгу ххуйсса хьунссия, агана цаппара яла хьхьичIунми, цIа дуркми спортчитал гьуртту хьуну бивкIссания, цIанасса ппурттуву гай хIадур хъанай бур гьашину Санкт-Петербург шагьрулий хьунтIисса Щаллагу дунияллул боевой искусствар­ттал тIуркIурдайн.