ХIурмат бусса чIурду булайми!
Жулва чIурду булунну адав-имандалул ва низамрал чулийсса инсаннахлу!
Жуна аьркинссар жува аьркинсса бакIчи.
Жува увчIайма – АьбдурахIман МахIаммадоври!

Увссар 1955 шинал Ккуллал шяраву. 8 класс къуртал бувну махъ зий ивкIссар Каспийск шагьрулий «Дагдизель» заводрай фрезировщикну. 1975 шинал увххун 1979 шинал къуртал бувссар Оренбургуллал лавайсса даражалул бахьттагьалтрал аьралуннал ПВО-рал зенитирттал ва ракетарттал командное училище ва хьуссар радиотехникийсса кьай-кьуй зузи даврил инженер.
1992 шинал заочнайну був­ккуссар Ухссавнил Ккавкказуллал социально-политикийсса институт ва хьуссар «Политолог. Преподаватель социально-политических дисциплин в высших учебных заведениях» тIисса пишакар.
Ванал бур кулпат, шанма оьрчI.
Къуллугъ буллай ивкIссар Германиянаву ва Ухссавнил Ккав­кказуллал аьралуннал округрай.
1988 шинал ивтссар ПВО-рал аьрал хIадур байсса ва цIусса ярагъуннил щаллу байсса центрданул командирнал хъиривчуну. 1993 шиная махъ къуллугъ буллай ивкIссар ДР-лул аьралуннал комиссиариатрай. 1998 шинал увкссар пенсиялийн.
1998 шиная 2001 шинайннин «Российское воинское братство» тIисса Аьрасатнал аьраличалт социальну буруччайсса фонд­рал Дагъусттанналмур бутIул каялувчину зий ивкIссар. 2001 шиная махъ зий ивкIссар пенсияртту бачIайсса центрданул хъунаманал хъиривчуну, 2003 шиная шинай, цIанасса чIумалгу зий ур ДР-лул ОПФР-данул зузалтрал цачIун бувсса проф­комрал председательну.
2004 шинал «Дагъусттаннал пенсионертурал союз» сакингу бувну, ганил каялувшивугу дуллай ур. 2005 шиная шинай ца чIумала хъанай ур «Аьрасатнал Пенсионертурал союзрал» (жяматийсса организацияр) президиумрал Председательнал хъиривчу. 2004 шинал цалва сакин бувну итабакьлан ивкIссар «Пенсионер Дагестана» тIисса кказит.
Аь. МахIаммадов хъана­хъиссар «Аьрасатнал пенсионертурал партия» сакин дурминнавасса ца, яла га партиялул Дагъусттаннал бутIул бакIчину хьуссар. Га уртакьну зий ур цайми партиярттащал. Патриотшиврул, Ватан ххирашиврул ххуллий тарбия хьусса АьбдурахIман МахIаммадовлун къаччиссар щялмахъ ва лажин ккарккун махъ бусаву, чялишну къарши уклай ур коррупциялийн ва властьрал органнаву ца тухумрал инсантал битлатисса иширттайн.
АьбдурахIман Кьурбанович МахIаммадов АьФ-лул Президент В. В. Путиннул хIукмулийну 2012 шинал цIакь увссар АьФ-лул ПрезидентначIасса СКФО-рал ветерантурал иширттал Координациялул Советраву. Цимилагу хьунаавкьуссар лавайми даражалул каялувчитуращал, гьаз буллай ур Ухссавнил Ккавкказуллал халкьуннал оьр­му щаллу баврил масъалартту. АьбдурахIман МахIаммадовлул ният дур республикалул каялувчинащал хьунаакьин жулла райондалул жяматрал захIматми масъалартту щаллу баву мурад­рай.
Ккуллал райондалул бакIчину увчIирча цалва хьхьичIсса яла агьамми масъаларттан ккалли буллай ур: шяраваллил хозяйствалул захIматкашнал хьхьичIра диркIсса цIа цIулаган даву, мунил гьанулий «ЗахIматрах бурувгун бусравшивугу, цIагу» тIисса принцип цIубуккан баву. Инсантурал ахIвал ххуй бавриву хъунмур захIмат бихьлахьима хозяйствалуву зузимари. Ризкьи гьарза баврийн, хъуру, лухччив гьарза даврийн хъарсса бур чIявучил маэшат.
ЧIявусса инсантуран паччахI­лугъ – му цила чIумал пенсияртту биян бавур, тIюварду ччуччиялул, гъилишиврул щаллу давур, коммунал хIаллихшиннахсса багьа булавриву тIайлашиву душавур, шяраваллил хозяйствалул бакIлахъия ласун кумаг бавур, социал хIаллихшиннал тIайлану щаллу бавур. Мунияту «чиновники – слуги народа» принципрайн чул бищунтIиссар райондалул бакIчинал цалла давриву. Райондалул жяматрахь ихтияр дуссар каялувчинаяту тIалав бан паччахIлугърал бакIрайн лавсъсса масъалартту – азарханардай ххуйну хъин баву, ххуйну дуккин баву, маэшат ххуй баву.
Райондалул къуллугъчитурал ва жяматрал оьрмулул даража гъан баву – демократия щаллу даврил яла агьаммур мурадри.
ПаччахIлугърал хIаллихшин­ну так цаппараннан ккаккан дурну дакъари, ми дур гьарца инсаннансса шартIру. ЛяличIинура къулагъас дан аьркинссар цивппалу ливчIсса хъунив хьусса инсантурах. Социал гарантияртту гьарза хъанахъиссаксса хъунив хьуминнал оьрму лайкьсса бикIан аьркинссар. Исполнительный органнал каялувчитурал, уттарами колхозирттал каялувчитурал, бизнесчитурал аьркинссар цащава шайсса даражалий кумаг буллан хъунив хьуминнан – миккунну жувагу нанисса. Кулпат – паччахIлугърал ва обществалул гьанури. Жунма аьркинссар лахьхьин жулла доходру тIайлану ишла дуллан ва тIайлану тарбия дуллан ялун нанисса ник. Му жулва ялун бучIанмурди ва жура жаваб дуллалиссару жулва оьрчIру тарбия баврихлу.
АьбдурахIман МахIам­мадов­лул, хъирив лавну жяматрал мюхтажшивурттал ва тIалавшиннардал, райондалийсса социал-политикийсса иширттал, хIарачат бантIиссар райондалул жяматрал ахIвал ххуй бан, райондалий дусса каширду ва луртанну ишла дурну.
«Так гьарца чувнал захI­матрах бурувгунни ганал лайкьшиврул ва бусравшиврул кьимат бищун аьркин­сса», — тIий ур АьбдурахIман МахIаммадов.