ЦIуссалаккуй, ЦIуссалакрал райондалул №1-мур азарханалий райондалул бакIчи ХIажи Айдиев ва Дагъусттаннал Халкьуннал Мажлисрал депутат Зайнуллагь Мирзоев хьунабавкьунни азарханалул коллективращал.

П. Рамазанова
Дагъусттаннал Президентнал къуллугъ чIумуйну бартбигьлагьисса Рамазан АьбдуллатIиповлул хъуннасса вихшала дур Президентнал 10 агьамми проектру бартбигьаврин кумаг булланссар тIий депутатъталгу, муниципал сакиншиннардал администрациялул хъунимигу. Мукун Президентнал дуллалимуницIун кабакьаву мурадрайсса хьунабакьаву дия ЦIуссалаккуймургу.
Зайнуллагь Мирзоевлул бувсуна Дагъусттаннайсса сайки цинярда партиярдан респуб­ликалул бакIчину Рамазан Аьб­дулатIиповлул кандидатура кьамулну душиву.
«Рамазан АьбдуллатIиповлул каялувшиврийну республикалий хъунисса дахханашивуртту хъанай дур социал-экономикалул сфералувугу, жяматрал оьрмулувугу, — увкуна депутатнал. – Ми агьалинал дакIурдиву респуб­ликалийсса оьрму, экономика, маэшат, низам хьхьичIуннай хьунтIишиврийнсса вихшала цIакь дуллалисса, ххуйчулиннайсса дахханашиннарду дур. Депутатътурал корпусгу мунал дуллалимуницIун кабавкьуну, агьалинал мурадру, ихтиярду дуручлай зунтIиссар».
ХIажи Айдиевлулгу бувсуна Президентнал бартдигьин тапшур бувсса проектирттал агьамшиврия ва ми бартдигьавриву агьалинан хайр-мюнпат хъунмасса бушиврия.