[dropcap]Ф[/dropcap]евральданул 14-нний Сочилийсса Аьрасатнал инвестициярттал форумрал лагрулий хьунабавкьунни ДР-лул БакIчи Владимир Васильев АьФ-лул энергетикалул министр Александр Новаклущал.
Ихтилат хьунни республикалий ччуччиялул ва энергетикалул комплексрал (ТЭК) тагьарданул хIакъираву.
Хьунабакьаврий гьуртту хьунни ДР-лул ХIукуматрал председательнал 1-ма хъиривчу ХIажимахIаммад ХIусайнов.
Республикалул каялувчинал тIимунийну, Дагъусттаннай дайдирхьуссар ТЭК-рал иширттал хIалкьазия лиян даврил хьхьичIалу кьукьинсса система. Утти марцIну, тIайлану зузаврия мюнпат хъун хъанантIиссар, къатIайлану зузаврия нигьачIаву дикIантIиссар.
Новаклул бувсунни дукIу Дагъусттаннай хьусса энергетиктурал учениярттая ва республикалий тарифру билаятрай яла лагьмину личIантIишиву, му мукуннугу, энергетикалухсса буржру хъунисса бушиву.
Хьунабакьаврил хIасиллу дуллай, республикалул хъунаманал бувсунни 2018 шинал Дагъусттаннай дурсса энергетикалул ученияртту Аьрасатнал Энергетикалул министерствалущал цачIу лахъи лаган дансса ният душиву.
